نفتتح دورتنا الثالثة للعضوات بكلمة شكر في حق كل من شاركتنا التميز للرقي بمنتدانا ….. شكرًا أنيقات منتدانا شكرًا مشرفاتنا الساهرات على نجاح الدورة…. بارك الله في الجميع و الف الف شكر. اضغط على الصورة لمشاهدة الوصفة على بركة الله
],vm hguq,hj hgehgem>>>>>>>>>> ohw fh’fhr hgfhj ,hgr’hkd
عدس بالدنجال والفلفلة صحي ولذيذ. 
هاد الوصفة صحية و طريقة ذكية باش نوكلو وليداتنا الخضر. 
1 كاس عدس. 1 حبة دنجال مقطعة. 1حبة فلفلة مقطعة. 1 " خيزو مقطعة دواور. 2 معالق ربيع مقطع. 2 ضروس ثوم. 1 بصلة. 2 مطيشات محكوكين أو كاس صوص ( بالنسببة للأخوات لي تتكون عندهم واجدة بحالي هههه) ملح . بزار. سكينجبير . كركم . تحميرة . كمون . زيت زيتون. 
كيفما موضح فالصور: نشحر بصلة وثوم محكوكين فزيت الزيتون. نزيد الخضار من غير مطيشة . نخليها فوق نار 5 دقايق. ثم نزيد مطيشة و نحرك لمدة 5 دقايق أخرى. نمرق بالماء الكافي ونزيد لعدس ولعطرية ونخليه يطيب 30 حتى 40 دقيقة حسب نوعية العدس. 
وها هو واجد نقدموه كيف بغينا. 
نتمنى يعجبكم هاد طبق. 
العدس بالجزر والنقانق 
السلام عليكم اخواتي ، كيف دايرين مع البرد، أنا ليوم فقت فصباح بانت لي شتا خيط من سما ، قررت ندير العدس ، هو لي غادي يصلاح مع هاد الجو ، غادي نردو يتنصب ،وانا نقول مع راسي ،مال العدس معليهش الله، حتى هو ندير ليه نيو لوك ههههه، خصني نجدد فيه شي حاجة ،حليت ثلاجة بان لي صوصيط والخيزو ف البلان هما لي غادي نزيد أولي ليها ليها ههه ، غير بدات الطنجرة تغلي وريحتها بدات تعطي ياسلام على مزيج الصوصيت والعدس ،اوى من الريحة بان العربون، غير حطيت الطبسيل فوق الطبلة ، مع أول دغمة بقيت نراقب شوفات ديال سي سيد ههه ، شاف موحا اش غادي يقول….. وعجبووووو جاه زوين مغاير عطاني الله صحة ههه ،اوى اش بغيتو كتر من هاد الشهادة احتى دراري أول مرة يرجعو لي طباسل العدس نقيين هههه ، جربوه حتى نتمى و ردو عليا. الطريقة والمقادير أول شيء ناخد طنجرة نرميو فيها العدس المغسول والمنقي ديالنا ، نزيد عليه الماء الكافي لي غادي يطيب فيه و نزيد الزيت البلدية ،نرد طنجرة تغلى شوية فوق البوطة 
من بعد نزيد بصلة شنايف ، وخيزو مقطع صغير 
،ونزيد مطيشة مقطعة ،ثومة مقطعة ،وربيع . 
عاد نزيد الصوصيط ومطيشة محكوكة، 
والعطرية ،ملح،البزار ، كمون ، تحميرة، زعفران إصطناعي . 
هاهو العدس ديالنا وجد بالصحة والراحة 
سباكيتي بالكفتة وصلصة الزبادي بالثوم 
على بركة الله -سباكيتي حوالي 120 غ -رابعة كفتة لحم متبلة بشوية ملح وابزار وكمون ومعدنوس – وللصلصة غادي نحتاجو : 2 دانون مسوس ومعلقة معمراش نشا + 2 فصوص ثوم محكوك (لي بغات نكهة الثوم تجي باينة كثر تزيد من الكمية) بطبيعة الحال تقدرو ضاعفو الكمية على حسب عدد الأفراد لي عندكم 
أول شيء كندير الماء يغلي مع شوية ملح باش نصلقو سباكيتي (أنا كنزيد حتى ورقة سيدنا موسى باش نسمها) 
في الوقت لي كتصلق فيه سباكيتي كنوجدو الباقي كنخلط الكفتة بالتوابل ، وكنديرها كويرات صغار وكنقليها في شوية زيت بلدية ملي توجد نحطوها على جنب حتى نوجدو الصلصة 
لتحضير الصلصة: كناخذو نفس المقلة لي قلينا فيها الكفتة وفي نفس الزيت لي طابت فيه كنزيدو الثوم ، غير يتشحر ويبدا لونه يولي ذهبي كنزيدو دانون مسوس من بعد ما خلطناه بالنشا ، غير يسخن نزولوه ونضيفو رشة ملح وابزار، حينت إلى خليناه حتى غلا غادي يعقاد ، وحنا بغينا صلصة خفيفة 
( إلى جاتكم صوص ثقيلة زيدو شوية من الماء لي طابت فيه سباكيتي) 
وهذا الطبق النهائي ، قدموه بالطريقة لي تعجبكم أنا خذيت الطبق درت سباكيتي في ألأطراف والوسط حطيت الكفتة وخويت عليها الصلصة وزوقت بالبورو 
سباكيتي بفيلي لاداند والصلصة البيضاء 
نبداو على بركة الله فيلي لاداند مقطع على شكل ستيك نديروه وسط بلاستيك وندقوه شوية باش يبقى محافظ على شكلو أثناء الطهي من بعد نتبلوه بملعقة صغيرة ثومة غبرة+ ملعقة صغيرة عشاب منسمة+ ملح+ملعقة موطارد+ملعقة هريسة أو فلفلة حمرة حارة+ 1/2 عصير حامضة+ 1/4 ملعقة صغيرة سكنجبير نخلطو جميع العناصر ونخليوها ترقد ونطيبوها في ملعقة زبدة وزيت نصلقو سباكيتي ونحضرو لاصوص : نديرو 2 ملعقة كبيرة زبدة + ملعقة نشا وملعقة دقيق نحركو مزيان ونضيفو 1/2 لتر الحليب بالتدريج من بعد نزيدو ملح بزار حكة حكوزة ختيارية ( لكن في أي صلصة بيضا ضروري من الكوزة أو إبزار أبيض) ونزيدو كاس من لاكريم فريش دائما مع التحريك نزولوه من فوق العافية ونضيفو الفرماج بنوعيه ونقدمو الطبق بالصحة والراحة ضروري يتقدم سخون 
طبق اللوبيا البيضاء نيو لوك. 
وصفة جديدة لطبخ لوبيا و تقديم مغاير على الشكل لي كبرنا معه نتمنى تروقكم . وتنفع للموظفات . تكون عندهم ديما لوبيا حبوب طايبة فالمجمد غير يجبدوها و يكملو تتقدم حتى فالصيف باردة و هكذا نستافدو منها طول العام. 200غ لوبيا بيضا يابسة. 2 فلفلات حمرين مشويين. 4 ضروس ثوم. عصير حامضة. نص كاس صغير زيت. ورقة الرند ( نسيتها ههههه) ملح . بزار . فلفلة حمرة حارة ( لي تيبغي الحار يكثر ). 
نطيب لوبيا ف الماء و الملح وبزار مع ورقة رند و ضروس ثوم . لما تطيب نصفيها و نحتفظ بشوية من ماء طايب. نطحن لوبيا طايبة مع فلفلة حمرة مشوية مقطعة و ضروس ثوم لي طابت فيهم . نزيد ملح و بزار فلفلفة حمرة حارة غبرة وعصير الحامض و نطحن الكل وفلأخير نزيد زيت زيتون و نخلط مزيان. 
ممكن نقدموها سخونة أو باردة حسب الرغبة. لي بغاها سخونة يرجع الخليط فوق نار مع شوية ما لوبيا و يقدمها بالصحة والراحة. 
هنا قدمتها مع مقرمشات مكسيكية. 
وهادي بالفلفلة خضرا مشوية ومعدنوس مقطع + كمون. 
مصاوبة بنفس الطريقة: 
لي معندهاش هاد الخلاط تستعمل كاس العصير. وهكدا إلى بغينا نقدموها مع مقرمشات. 
الباستا بالأعشاب 
هاد الكمية تكفي لشخص واحد ، يمكنكم مضاعفة المقادير حسب عدد الأشخاص – زلافة صغيرة باستا (اي نوع مفضل عندكم) – أعشاب منسمة (معلقة استعملت زعيترة – معلقة ريحان مقطع – 2 معالق معدنوس مقطع) – فيليه ديك رومي ، أو دجاج – 2 معالق زيت زيتون ، – شوية ملح وابزار – ثوم مدقوق – أي جبن متوفر عندكم ، أنا استعملت جبلي لي منسم بالثوم 
أول حاجة كندير الماء يغلي وكنصلقو فيه الباستا مع رشة ملح ثم كنوجدو الباقي في الوقت لي كتصلق فيه الباستا كناخذو فيليه الديك الرومي كنتبلو من الجهتين بشوية ملح وابزار كندير المقلة تسخن كنضيف معلقة زيت زيتون ، وكنحط الفيليه وكنزيد العافية باش يتحمر فقط ، حينت غادي نكمل طيابو في الفران 
ملي كيتحمر كندهن جهة وحدة بشوية موطارد ، وكناخذ شوية شوية من الأعشاب لي وجدت ونخلطهم (زعيترة وريحان ومعدنوس) وكنحط عليهم الفيليه من الجهة لي فيها الموطارد باش يلصقو فيه الأعشاب ، ونديرو في لاطة وندخلو الفرن يكمل طيابو 
كناخذ المقلة فين قلينا الفيليه كنضيف ليها معلقة زيت غير تسخن كنضيف الثوم ، تشحر شوية ونضيف الأعشاب ، نحرك كلشي ، غير نبدا نشم ريحة الأعشاب بدات كتبان ونطفي ونضيف الباستا ، ونضيف الجبن لي عندنا ونخلط كلشي ، (أنا ضفت معلقة جبلي منسم بالأعشاب) 
كنقدم الباستا في طبق فوق منها قطعة الفيليه مقطع أو خليوها كيفما هي نتمنى هاد الوصفة البسيطة تنال إعجابكم ، وبالصحة والراحة
لوبيا بطريقتي 
كولكم كتعرفو طيبو لوبيا ولكن كل واحدة عندها طريقتها ان شا ء الله تعجبكم لحم (اختياري حيت راجلي كيبغها بلحم)+بصلة+مطيشة+لفت +جزر+ثوم+قزبر ومعدنوس +زيت +ملح+ابزار+تحميرة+خرقوم+سكنجبير+شوية+كامون+مركز+طم اطم لوبيا مرطبة قبل في ماء 
نقليو لحم مع بصلة 
من بعد نزيد مطيشة خضرة ثوم و قزبر 
تم توابيل ولوبيا مركز الطماطم ونمرقو بالماء كافي ونخليوها حتى تطيب لوبيا
لبات بالفلفلة بطرق مختلفة جربي ونوعي على ذوقك أنيقتي 
يومكم سعيد أنيقاتي العزيزات نتمنى تكونو بألف خير وأموركم تمام التمام انتما وكل عزيز وغالي على قلبكم يارب وصفتي اليوم بسيطة وساهلة وسريعة ممكن تنوعي فيها كيف بغيتي وبالمتوفر عندك أنيقتي نتمنى تنال اعجابكم هدو المهمين في جميع الوصفات اي نوع كتفضلو من لباط فلفلة الوان لمتوفر عندنا ملعقة زبدة +ملح+ابزار حبة بصلة هدو على حسب اختيارك للوصفة شوية صدر دجاج شوية كرافص أو قزبر 200 مل قشدة او مطيشة مطحونة تومة وخرقوم وسكنجير الطريقة الآولى:كنغلي الماء وشوية الملح ونضيف لباط حتى تطيب وكل واحد وكيف كيبغيها في طياب 
كنصفيها ونضيف لها ملعقة زبدة انا كنخدم بلايت ونقلبها مزيان ونخليها 
كنقطع لبصلة رقيقة على الطول ونشحرها مع شوية ملح وخرقوم 
كنضيف لفلفلة حتى هي مقطعة على الطول ونخليها حتى تدبل شوية 
تم نضيف لكرافس مقطعين رقآاق او محكوك وتومة ولبزار 
تم كنضيف مطيشة مطحونة او صالصة جاهزة ويتقدم بالصحة والراحة 
الطريقة التانية :كنشحر بصلة ولفلفلة بنفس الطريقة الآولى كنضيف غير شوية لبزار وكنطحنهم مع 200 مل قشدة الطرية ويتخلط مع لباط ويتقدم بالصحة والراحة 
الطريقة التالتة : كنقطع بصلة رقيقة ونشحرها مع شوية زيت ولملح وخرقوم تم كنضيف فلفة ودجاج مقطعين مكعبات 
تم شوية قزبر وإبزار وتحميرة وسكنجبير وراس تومة ونخلط مزيان 
تم كنضيف مطيشة مطحونة او صالصة جاهزة (وممكن نضيفو 200 مل القشدة الطرية عوض صالصة كتجي غزالة مع دجاج وفلفلة بلا قزبر )
تم كنضيف لباط لسلقناها وضفنا لها زبدة بنفس الطريقة الآولى ونخلط مزيان 
نتمنى تعجبكم وصفتي البسيطة وتجربوها وبالصحة والعافية على قلوبكم يارب 
المجدرة الشامية 
اكلة سهلة واقتصادية والاهم انها صحية وبنينة وطريقة مغايرة ناكلو بيها العدس عدس روز كلاصي نص بصلة مشلضة فص ثوم ملح/ابزار/كمون بصلة جوانح زيت 
اولا نغسلو روز ونديروه يرطاب فالماء 
عاد ندوزو للعدس نغسلوه ونردوه يتسلق منين يطيب خاصو يبقا شاد راسو شوية نصفييوه ونحتافضو بماء السليق ديالو 
فكاسرونة نديرو شوية زيت نشحرو بصلة لي مشلضة معا شوية ملح ابزار وكمون وفص ثوم محكووك حتا تذبال نزيدو روز ونحركو شوية عاد نزيدو العدس لي سلقنا من قبل ونمرقو بماء لي سلقنا فيه العدس غير القياس لي يطيب فيه روز هنا درت تقريبا زلافة وشوية ماء ونغطيو عليه ونقصوو حتا يطيب علا خاطروو 
فنفس الوقت نكونو موجدين مقيلة فيها زيت شوية بزايد ونديروو بصلة جوانح تتقلى حتا تولي قهوية شوية عاد نحيدوهاا 
فالاخير تنحطو روز والعدس ديالنا بعدما يكون طاب ونزوقوه بالبصلة لي قلينا وهاهو الطبق واجد ساهل ماهل وصحي وطريقة جديدة لي نقدمو بيها العدس بدل الطريقة التقليدية بصحة والراحة