شكون جاها سكر الحمل في الشهر السابع ؟

السلام عليكم
الله يجازيكم بخير مشيت الطبيبة كيف سبق لي كتبت وقالت لي كرشك كبيرة والماء زايد شوية وحتى البيبي في الوزن زايد باسبوع في الوزن
وعطاتني ندير تحاليل السكر الكليكوز درتوا وانا صايمة وشربت داك الكيلكوز عاودت عاودت بعد ساعة بلا اكل عاود ساعة اخرة بلا اكل وخرجات النتيجة التالي

في الاول خرج ـــــــــــــــــــــــــ105
من بعد الكيلكوز ـــــــــــــــــــــــ191
من بعد ساعة اخرى وانا صايمة 116
ومشيت للطبيبة ديال السكر قالت لي منعطيكش الانسولين حتى نجربو الريجيم قطعات عليا الخبز والسكر نهائيا
شكون وقع لها بحالي وشنو الحاجات لي فيهم السكر في الماكولات
واش وماثرش على الجنين هاد السكر
والولادة واش ضروري قيصرية وقبل الوقت حيت ولادتي الاولى ولدت طبيعي ومكانش فيا السكر

---

a;,k [hih s;v hgplg td hgaiv hgshfu ? hg[lg a;v

معندي باش نفيدك غير بغيت ندعي معاك الله يسهل امورك وتولدي طبيعي

السلام عليكم و رحمة الله أختي
أول حاجة الله ييسر ولادتك و يرقك فكاكة ساهلة يا ربي
راك بحالي أختي غير ماتخافيش سكر الحمل عادي و كايمشي من بعد الولادة
حتى أنا كان فيا و عاد كيف ولدت هادي شهر و نص و قاسني فالشهر السابع
كنت درت الريجيم شوية قاصح و لكن لا بد من الصبر
كنت ناكل حوت فيلي لاداند الدجاج كفتة بلا شحمة و مرة مرة لحم احمر وهادشي كامل يا آما مشوي أو مفور أو كانطيبو فشوية ماء يعني بلا زيت
شلاضة بجميع الخضر الخضراء مع مطيشة
دشيشة الشعير . خبز الشعير . حرشة بالشعير
حليب 0% عصير 0%
و تجنبي البطاطا خيزو و الكرعة الحمرا حيت حلوين
بالنسبة لكسكسو ايلا عزيز عليك بحالي هههه عوضيه ببلبولة الشعير
الله يشافيك و تشوفي وليدك سليم معافى يا رب

الله يجيب الشفاء و يتمم حملك على خير من الاحسن نقلي موضوعك للدكتورة بشرى هي غادي تعطيك جميييع المعلومات و الاحتياطات لي خاصك ديري .

السلام عليكم
انا اختي كان جاني سكر الحمل حت بقات لي خمست السيمانات و نولد
يعني حت الاخير فالتامن
و الطبيبة اعطاتني سيمانة ديال الريجيم و متقادش ليا و من بعد دوزاتني للانسولين كنت كنديرها تلاتة المرات فانهار قبال الاكل فالفخد ديالي
و ولدت بالفتيح و لكن ماشي عل قبل السكر
ولدت بالفتيح حيت الوالدة تحلات بربعة سنتيم و دقات البيبي تقالو شويا و قالت لي الطبيبة الوالدة باقا متحلاتش مزيان و البيبي دقات قلبو تقالو و خافت عليه لا ميتحملش مازال دكشي علاش فتحات لي
اختي من بعد ما ولدت بنهار واحد تقاد السكر و رجع عادي الحمد لله
و البيبي حت هو من بعد الولادة دارو ليه تحليلة السكر كانعندو كلشي مزيان الحمد لله
ماخافيش و متخلعيش مايكون غير الخير ان شالله
الله يفكك عل خير و يتمم ليك فرحتك ان شالله

ختي لبنى معندي فكرة انشاء الله كلش غيدوز مزيان الله يتبث حملك أختي

لبنى متخافي والو ديري ريجيم غي وحدك و منعي سكر و الفورص و البطاطا و النشويات و كتري من السلطات و الملفوف را كيقاد السكر هو و كرعة خضراء و نزيدك اهم حاجة را الاعصاب سبب مباشر في ارتفاع السكر.انا كان عندي في شهر 4 لقاو 107 قبل الفطور و تبعت ريجيم غي بوحدي و الحمد لله ليوم عبرت لقيت 82 نزل .بعد غدا نعبر حنت عندي مكينة في الدار.اما تحليلة الكليكوز تال نونبر عاد نديرها.بعدي من الفورص راه خطييير.انا كنعجن خبزي بلقمح و زرع و نخالة.نتمنى ليك الشفاء و را خليت ليك رد في تجمع ديالنا

بارك الله وفيكم الاخوات لي جاوبتوني وطمنتوني غنتبع نصائحكم والله يدير الخير

أختي أنا جاني في ولادتي السابقة في الشهر 6 وتبعت عند 2 إختصاصيات إختصاصية السكري وإختصاصية في التغدية تبعت الرجيم لعطاتني هو قاصح بزاف ولكن مكينش البديل أنا نقول ليك الممنوعات الخبز لباط النشويات الطبيعية بجميع أنواعها تنقصي من منتوجات الألبان مزيان واخة لمكتوب فيها طبيية وخلية من الدسم مثل دانون الفرماج الحليب قطعيه لأنه فيه نسبة عالية من السكر الطبيعي والفرماج واخة يكون خالي من الدسم متاكليهش لأه كيعمل كحاجز للجسم ومكيخليهش يستفيد من الأنسولين يعني قطعيه العصير ممنوع خاصك تاكلي الفاكهة كما هي حيت فاش كتطحن كتفقد الألياف الفواكه الحلوة ممنوعة مثل العنب الموز .. كثري من الخضر السبانخ القرعة الكرومب الشيفلور الخرشف مزيانين اللحوم الحمراء من الأحسن متاكليهاش لأنها غنية بالدسم واخة متكون مفيها شحمة كطلع السكر عن تجربة عوضيها بالحوت الخبز يكون دقيق كامل المقليات ممنوعة والدهون لأنها تعيق إمتصاص الأنسولين كولي اللوز الكركاع هذه هي نصائح الإختصاصية لكنت متبعة معاها داب حتى أنا في السكري منذ الشهر 3 كنعبرو 6مرات في اليوم حتى نعاود نمشي عند الإختصاصية ونشوف شنو غاد تقول لي الله يسمعني خير غاد تنقصي في الوزن أنا في 3أشهر نقصت 10كيلو والآن نقصت 3كيلو في ظرف شهر واحد الله يستر وصافي

نسيت لقيت طريقة كتنزل السكري مزيان وصحية وطبيعية متبقايش تشربي الماء بارد شربيه ساخن بحال كتشربي الشاي كأس كبير ساعة قبل الأكل وساعة بعد الأكل وغاد تلاحظي أنه نقص بطريقة جيدة بزاف هذه طريقة جديدة لعلاج السكري بحثي في الأنترنيت وغاد تلقايها وشربي الماء الساخن على مدار اليوم مزيان أنا كنعبر فاش كنشربو كنلقاه نزل آه نسيت المشي ساعة يوميا إجبارية نصف ساعة صباحا ونصف ساعة مساء حتى كيطيبو ليك الرجلين