salam akhawati rajai mankom li sba9 o jarbat chi wasfa dyal l haml o sad9at liha t9olha liya ana 9arabt nkamal 2 ans o ba9i majabch allah
fidoni akhawati ghir allah ykhalikom matkonch kadar fl masran hit 3andi les gaz fihom
kantsana radkom al ghalyat
o allah yjazikom kol khir
allah ykhalikom fidoni
اللي بغيت ننصحك بيه هو انني بحالك كنت منتظرة تال الشهر الفايت و حن عليا الله بعد عام د الانتظار العقبى لجميع المنتظرات
الطبيبة كانت قايلة ليا هرموناتي مرونة البروجسترون طايح بزاف شبه منعدم و الاستروجين طالع بزاف و خرجات ليا ديفاستون و ايتروجستون ….. و ديما الدورة مخربقة يعني ما نقدرش نعرف فوقاش الباضة عندي و غادية غي عالله .. و طبعا كانت قايلة ليا غادي نلقى صعوبات ملي نبغي نحمل و نصحاتني ما ندير تا شي كينة و لا غيرها باش ما نضيعش الوقت، و قالت ليا حتى الى حملت نقدر نطيحو بسهولة بسبب الهرمونات ديالي … يعني كحلات ليا الضوصي
الطريقة اللي درت الشهر الفايت الحمد لله صدقات من اول تجربة يعني عليك بيها و هي طريقة الحرارة الصباحية باش تحددي الاباضة فوقاش :
تبداي النهار الاول من الدورة و تاخدي حرارتك فالفراش قبل ما تتحركي ولا تاكلي اي حاجة باش ما تتأثرش الحرارة ديالك و تجي مضبوطة يعني تبيتي ميزان الحرارة حداك و ورقة و ستيلو باش تعقلي و تديري التيليفون يفيقك في نفس الساعة مثلا 6 او 7. الحرارة تاخديها بنفس المحرار و بنفس الطريقة ديما يا إما من الفم او من التحت
ايوة مع الايام فالمرحلة الاولى غادي تشوفي الحرارة ديالك غادية فواحد المستوى معين هادي هي مرحلة ما قبل الاباضة، من بعد النهار اللي غادي تشوفي هبوط مفاجئ فالحرارة، و الغد ليه طلوع الحرارة بحيث تولي أعلى درجة سجلتيها من اللي كانت فالايام ديال المرحلة الاولى: هاديك هوما اليومين اللي عندك فيهم أحسن فرص ديال الحمل. البنات اللي عندهم دورة 28 يوم كا تكون اباضة تقريبا ف 14 ، انا دورتي كل مرة و شحال ما بين 30 و 32 يوم و هاد الشهر كانت اباضة نهار 20 يعني كل امراة و فوقاش
حاجة اخرى كنت كا نشرب الحلبة مرقدة فكاس د الماء ليلة كاملة و نشرب الماء فالصباح و لكن فقط فالمرحلة اللي قبل الاباضة زعما لتنشيط الهرمونات طبيعيا، و من بعد الاباضة حبستها تفاديا لا يكون حمل لأن الحمل تسبب الاجهاض الله يستر
و نصيحة ديال عجوزتي كنت كا ندير البيض فالفطور هههه و طبعا خاص علاقة مع زوجك كل يوماين باش تكوني متاكدة ما تزكليش الاباضة، و ما تنوضيش كا تجري من بعد بقاي ف فراشك و ديري مخدة تحتك و الاحسن بقاي تال الصباح. وخا هاد النصائح ماشي مثبتة علميا 100 فالمئة و لكن احنا شنو خاسرين
أخيرا ما تديش على الاطباء بزاف خودي بالاسباب و لكن راه ربي ملي كا يبغي راه بلا كلوميد و لا غيرو انا كون ديت على هدرة الطبيبة كون راني قاطعة الاياس. يا ربي نفرحو بحملك قريبا ان شاء الله
اي سؤال هانا معاك
المشاركة الأصلية كتبت بواسطة amiraamal 
fidoni akhawati ghir allah ykhalikom matkonch kadar fl masran hit 3andi les gaz fihom
kantsana radkom al ghalyat
o allah yjazikom kol khir
ان شاء الله الاخوات يفيدوك والله يرزقك الذرية الصالحة عليكي بالاستغفار