لي بغات شي مساعدة في فيزا لبلجيكا تدخل الجزء7

أنا غادي نقوليكم بالضبط شنو درت وشنو الأوراق اللي دفعت.
مع العلم أني عندي ولد عام و نص و غادي نقول حتى شنو سيبت ليه هو.
راجلي معندوش الجنسية.
الدوسي ديالي درت فيه 3 ملفات الأول كلشي الأوراق أصليين و التاني و التالت فوطوكوبي ديالهم.

الدوسي الأول :
– الفورميليغ اللي خرجت من السيت ديال القنصلية.عمرتو و لصقت فيه الصورة ديالي (ضروري الصورة تكون الخلفية ديالها رمادي).
– فوطوكوبي ديال الصفحات الستة الأولين ديال الباسبور (أنا كاليزيتو واخا هو ميحتاج).
– فوطوكوبي ديال البطاقة الوطنية ديالك (متحتاج تكاليزيها).
– السجل العدلي و ردو بالكم ديال المحكمة ماشي ديال البوليس مكاليزي فالقنصلية.
– شهادة طبية من عند طبيب تابع القنصلية ديال بلجيكا (كل مدينة فيها طبيب تابع القنصلية ديال بلجيكا.بالنسبة لأكادير دكتور تمستيت أي تاكسي غادي يوصلك حتى لعندو).
– نسخة رسمية من شهادة الميلاد ديالك مكاليزيا فالمحكمة و وزارة الخارجية و القنصلية.
– ترجمة ديال عقد الزواج مكاليزيا فالمحكمة و وزارة الخارجية و القنصلية (غادي تكاليزي الأصلي و الترجمة و ديريهم فالدوسي بجوج).
– جوج ديال البراوات فيهم العنوان ديالك و التنبر.
– فوطوكوبي ديال بطاقة الهوية ديال راجلك.
– نسخة رسمية من شهادة الميلاد ديال راجلك مكاليزيا فالمحكمة و وزارة الخارجية و القنصلية.
– التأمين الصحي (راجلك هو اللي يسيفتو ليك حيت غادي يسيبو تما).
– نسخة ديال الايجار تكون أصلية ماشي فوطوكوبي.
– كونترا ديال الخدمة + الوراق ديال الخلاص على الأقل 3 الأشهر الأخيرة.

هادشي كلو ديري ليه 2 فوطوكوبي و كل فوطوكوبي ديريه ف دوسي.
عنداك ديري فوطوكوبي حتى لبرلوات هههههههههه

و ولدي درتلو دوسي فيه 3 ملفات واحد أصلي و التاني و التالت فوطوكوبي ديالهم.
الدوسي الأول:
– نفس الفرميليغ عمرتو ليه و لصقت فيه الصورة ديالو.
– فوطوكوبي ديال الصفحات الستة الأولين ديال الباسبور.
– نسخة رسمية من شهادة الميلاد ديالو مكاليزيا فالمحكمة و وزارة الخارجية و القنصلية.
– شهادة طبية من عند طبيب تابع القنصلية ديال بلجيكا.
– جوج ديال البراوات فيهم العنوان ديالك و التنبر.
– فوطوكوبي ديال بطاقة الهوية ديال باباه.
– فوكوكوبي ديال شهادة الميلاد ديال باباه.
– التأمين الصحي.
– فوكوكوبي ديال الايجار.

هادشي كلو ديري ليه 2 فوطوكوبي و كل فوطوكوبي ديريه ف دوسي.