الجدول اليومي للأكل

من بعد واحد الأسبوع ولا زوج كنبداو نخلطو الخضر، وندخلو اللحم الأحمر والأبيض والسمك فالتغذية ديال الطفل، ضروري ياخذ الطفل اللحوم ولو مرة واحدة خلال الشهر السابع تفاديا لفقر الدم، إيلا قدرتي تعطيه أكثر يكون أحسن، دخلي أيضا فهاد المرحلة أصفر البيض مسلوق معكيه مع الحساء، بداي بربع المح، ثم النصف ثم يولي ياخذ أصفر كامل في أواخر الشهر التاسع… انتبهي أبيض البيض ممنوع منعا كليا حتى يكمل الطفل سنة كاملة لأنه كيتسبب فحساسيات!

ملي إن شاء الله طفلك يتوالف الخضر كاملة، تقدري تولي ديري ليه حساء تخلطي فيه جميع الخضر، وديري معاهم قطع اللحم أو الدجاج وكميشة دالعدس وكميشة دالروز، وتطيبي كلشي وتقسميه فعلب واحتافظي بيه فالمجمد، كل يوم عطيه علبة منهم: مثلا اليوم الحساء لي فيه اللحم، غدا لي فيه الدجاج بعدو غير خضر وضيفي ليهم أبيض السمك مفور أو أصفر البيض وهكذا…

من بعد الحساء ياخذ الطفل الفواكه كيف قلنا مسلوقة ومطحونة

في أواخر الشهر الثامن تقريبا إن شاء الله، تبداي بدل ما تطحني تمعكي غير بالفورشيط باش الطفل يبدا يمضغ شوية واخا ما عندو سنان، المهم ما يبقاش موالف كلشي مطحون

حتى حدود السنة كيبقى الحليب هو الغذاء الأساسي للطفل، والأغذية الاخرى ما هي إلا مكملة

الأطباء كينصحو تسبقي الرضعة هي الأولى عاد موراها الأغذية الأخرى، أنا صراحة هاد المسألة ما كانتش مسلكاني مع ولدي فكنت كنخالف وقت الرضاعة مع وقت الوجبات الأخرى

الحبوب أو السيريلاك كيبقى مهم وضروري، ختاريه بحسب ما يناسب سن الطفل ديالك

حليب البقر ما تعطيه ليه حتى يكمل على الأقل 9 أشهر والأفضل يبقى حتال سنة

اليوغورت والدانينو والأجبان حتى هي ابتداء من الشهر التاسع

فواكه البحر بحال أبيض البيض حتى يكمل الطفل سنة، وبعض الفواكه بحال الكيوي حتى هي حتى يكمل الطفل سنة

ما تنسايش الماء مهم بزاف فهاد المرحلة، والملح كيفما قالت ليك الأخت قبل مني ما يدخل فالتغذية حتى يكمل الطفل سنة، هاديك الساعة تولي توكليه من الأكل لي كتصاوبي للأسرة كاملة