مساعدة عافاكم في شراء الطلامط

حبيبة مدام انك فكازا راه موجود الخير
ممكن تمشي لدرب عمر او لحي الفرح
دوري مزيان عاد شري حتى ديري مقارنة بين الاثواب و نوعيتها و اثمنتها
ممكن من محل لمحل تلقاي فرق ديال 30 الى 50 درهم ناقصة او زايدة

بالنسبة للثوب الى بغيتي صالون بلدي معمرو ميضيموضا او تفوتو الموضة
فعليك اما بثوب نوع بنشريف او بالمبرة هادا الزوج مكيديموداوش و ديما عليهم الهمة و كيعطيو للصالون اصالة و شان و طبعا كيصبرو
و بالنسبة للخياطة ديري خياطة تقليدية منها متفوتهاش الوقت و تجي قديمة و منها كتكونمتقونة و مكتكرفصش مه الوقت
الخياطة التقليدية عنيت بيها السفيفة التقليدية للي كيتخيطو بيها الجلالب ختاري الموديل للي يعجبك و ديريه بحريراصلي

نفس شي بالنسبة للريدوات و الخامية و لاناب و الاكسيسوارات ممكن تشريهم مع الثوب كلشي يكون متناسق
اما فدرب عمر او حي الفرح درب عمر فيه الاخيارات كثيرة و منوعة لا من جهة الاثواب لا من جهة الاتمنة

سيري دوري مزيآآن و خوذي وقتك متزربيش

العفو احبيبة

كيف قالت ليك الاخت سوق الاربعاء حتى هو فيه الموجود و الرخا
لكن ضروري من الراجل يكون معك و تحضيو راسكم لانه الشفارة و القطاطعية كثار فيه الله يحفظ

و تفكرت مكان اخر هو قسارية فم الحصن فالحي المحمدي حتى هي فيها الثوابات للفراش

بالنسبة للزربية فالاولان للي قلتي عندك كتجي مع كلشي
الرزبية الحمراء او الڭرونة او البريك كتجي مع كل انواع الفراش لانها لون تقليدي و ملكي يعني مناسب لكل الصالونات ويلا لاحظتي اغلب الصالونات التقليدية الرفيعة كتكون زربتيها حمراء او ڭرونة

اما البيج فراها حتى هو لون يجي مع كل الالوان

بالنسبة للون الفراش فقبل متاخذيه فكري فلون كيقبل الوسخ باش ماشي كل مرة يخصك تصبنيه و تبان فيه الغبرة و ليطاش بسرعة
ايضا شوفي البيت للي غتفرشي كيف عاملة الإضاءة فيها
لون كان كيدخلها الضوء و متيسعة ممكن ديري فراش لونو مغلوق لانه مغيأثرش على التيساع
لكن لو كانت البيت او الصالون مكيدخلش ليه الصوء بشكل كافي و مظلم نوعا ما او حتى كان ضيق فغيخصك تعملي شي لو مفتوح باشيعطي الاحساس بالتيساع و فنفس الوقت يضوي المساحة