التركية ولا المصرية ولا المغربية

عفاكم أخواتي راه بغيت نشري زربية للصالون وماعرفت إنا ماركة اللي مزيانة خفت لانطيح فشي ماركة خايبة ولا كتشد الخملة هاداك شي علاش بغيت نتشاور معاكم المهم راني درت واحد الدويرة صغيرة أنا ساكنة فسلا الجديدة ولقيت كاين الزرابي ديال تركيا ديال مصر ولقيت وحدة عجباتني ڭال ليا مولاها را سميتها الجديدية ديال الجديدة 160 دهم لمتر باش تنصحوني أخواتي شكرا مسبقا

---

hgjv;dm ,gh hglwvdm hglyvfdm

السلام عليك أختي،أنا كنفضل الزربية المغربية في المرتبة الأولى + الزربية التركية،غير هي الزربية التركية المزايا اللي عندها خفيفة خصوصا اللي مصنوعة بالحرير ماشي بالصوف غير اللي مكيعجبيش فيها مشارجية بزاف أي مزوقة كاملة،وحتا أنا كنت حايرة مابين المغربية و التركية وفي الأخير آخترت الزربية المغربية ونصحوني باش ناخد زربية شهرزاد إكسترا هي راه لمتاسيون ديال الزربية الرباطية لمخدومة باليد وهاد الزربية شهرزاد إكسترا مخدومة بالمكينة في الجديدة أي جديدية والثمن باش خديتها 230 درهم لمتر

حض موفق لك اختي كنضن بلي رويسي نادية عندها الحق و انا متافقة معاها

شكرا أخواتي على الرد ديالكم الله يعطيكم ما تمنيتو فخاطركم بغيت نسولك آختي نادية واش الماركة غتكون مكتوبة فظهر الزربية ؟

آميييين أختي، بالنسبة آسميات اللي كتكون مكتوبة في الزرابي، أقصد الزرابي لمخدومين بالمكينة كتبقى على حسب المصنع، كاين اللي كتكون السمية مطبوعة في ظهر الزربية وكاين اللي كيلصق واحد ticket مكتوبة فيها إسم الزربية مثلا شهرزاد إكسترا بحال اللي آخديت، وكاين اللي كتلقاي مافيها لا ticket ولا طبعة هادوك كيكون ticketاللي فيه سمية الزربية طاح مع هز وحط حيت كيكون غير لاصق ولكن مول المحل كيكون عارف سمية الزربية وخا ميكونش ticket

اختي الزربية المغربية الرباطية ما كينش بحالها ولللللللللللللللللللللللللللللللللللللللللللكن اجا وما هزها لك منين تجي تخملي واشمن غبرة كتهز اما يلا فكرتي تصبنيها كارتة
انا كنفضل تركيا وكاينين زرابي رائعين سميتهم روائع السجاد اظن ديال مصر او دبي فيهم الديكور وخفاف وروعة

الزربية المغربية الرباطية

اختي انا عندي ميرينوس اديال مصر اغزالة اختي وماكتشد ش الخاملةو وماللي كتهازيها ماتلقاي تحت منها لا غبرة لا والو انا اختي عندي فيها 3 علا 2 اخديتها 1500درهم هادي 5 سنين
سيري اختي مرجان راه فيهم ويمكن هاد الايام ديرين تخفيض
وبالنسبة اديال الجديدة ايلا كان مكتوب فيها النساجون مانسحكش تشريها حيت عند خويا وكتشد الخملة

انا متفقة معاك على ميرينوس ممتازة, شهرزاد حتى هي مزيانة اذا كنات الاخت السائلة باغية الصالون يجي بلدي

chokran a 7bibati 3la rododkom w htimamkom lmohim ana 9rart nakhd zarbia chahrazad 7it 3jbatni gha tji zuina f salon bldi w mafihach zwa9 bzef w chokran marratan okhra w 3wachrkom mbroka