أنيقاتي شخباركم كيدايرين لباس؟ نتمنى تكونوا فأحسن الأحوال ونتوما تتقراو موضوعي إن شاء الله.
كيفما باين فالعنوان اختكوم هازا شوية د الشحمة لي ماغنسميها لا فولادة بالفتيح لا فالرضاعة سببها الرئيسي هو وباغيا نتخلص منها بإدن الله داكشي علاش قررت نفتح هاد الموضوع باش يكون حافز ليا فأوقات اليأس ، غنبدا نحط الوجبات لي كليت طوال اليوم بالتفصيل ونوع الرياضة لي درت وأي معلومة قريتها ودرتها نفعاتني او ما نفعاتنيش غنكتبها إن شاء الله، خلاصة القول غتكونوا معايا فالريجيم دقة دقة، انا غنستافد منكوم أولا تشجيعاتكم ثانيا غنبقا نضرب حساب للماكلة حيت عارفة تابعني نكتب شنو كليت بأمانة، ونتوما غتستافدو إما من النضام او شي تجربة دشي وصفة او شي معلومة يلا كتب الله، هادي هي الفكرة ديالي نتمنى انها تعجبكوم وتلقى صدى طيب فنفوسكوم بإدن الله.
دعيوا معايا يتبتني الله ويعاوني على خسارة الوزن مشية بلا رجعة باغيا نعيش حياتي نكون رشييييقة نلبس لي بغيت وويواتيني بلا منسمع تعليقات منهنا وملهيه والغلاضات هوما لي غيفهموني 
ستافدت بزاااااف الحمد لله من التجمعات لي دايرين الاخوات الله يجازيهوم بخير بغيت نشكرهوم ونقولهوم الله يضعفني ويضعفكوم على خيييييييير.
ندوزوا المعقول: غنعطيكوم الخطوط العريضة ديال النضام ديالي :
1. تنشرب 2 لتر على الاقل فاليوم كنشرب شوية قبل الفطور والباقي كنوزعو على اليوم كامل متنشربش مور الماكلة مباشرة وكنحاول نسالي قبل السابعة مساءً تنضرب حساب المرحاض أعزكم الله حيت كنت كنبات كنشرشر حاشاكم 
2. الرياضة عندي 3 أيام فالسيمانة تندير رياضة المشي في المنزل كانت حطاتو واحد الانيقة الله يجازيها بخير تتمشي علاين 5 كيلومتر ونتي واقفة فبلاصتك غنقلب على الرابط ونجيبولكوم، ولدي تنديه للمدرسة و نرجع على رجلي 4 دالمرات فاليوم باستثناء يوم الاربعاء الصباح فقط والسبت والاحد عطلة، وطريقة أخرى تنديرها هي انني بعد كل صلاة وفنفس المكان تندير 7ًدقائق حركات دالكرش باستثناء صلاة الصبح كنكون داااايخة
3. عجنت خبيز ديالي بوحدي غي بطحين دالزرع بنخالتو وقبصة دالملحة، تنحاول ننقص من السكريات مثلا الحليب تنشربو بلا سكر، النشويات قليييل ولدي مسكين شحال وهو تيرغب فيا نديرلو سباكيتي ومبغيتش حيت عارفة يلا درتها ماغنقدرش نقاومها خليتها حتى كنت صايمة ودرتهالو للغداء هههههه
هادشي لي جاني دابا لبالي ولي تفكرتها غنكتبها للحبيبات الانيقات ديالي ربي ميحرمني منكم
صلوا على الحبيب المصطفى عليه أفضل الصلاة والسلام
d,ldhj fh’,.m lu hgvd[dl
المشاركة الأصلية كتبت بواسطة ام الياس وايناس 
آاااااميييين وشكرا على الاهتمام
المشاركة الأصلية كتبت بواسطة ام رميساء 2024 آمين شكرا احبيبة
انا بغيت ندير هاد الموضوع باش نشجع الانيقات لي باغيين يضعافو وكدلك نستافد من لي سبقوني يفيدوني يلا غلطت فشي حاجة انا نتقبل الملاحظات بصدر رحب
غنبقا نحط التقرير كل يوم فالليل إن شاء الله ونشوف تعليقاتكم وتقييمكم ليه، بالنسبة للوزن غنبدا نتوزن يوم الاربعاء من كل أسبوع بإدن الله
نجيوا دابا للخلطات غنقولكوم التجارب لي درت:
واحد الانيقة كانت حطت وصفة تتكون من خل التفاح و سكين جبير تدهنهوم فالكرش وتلوي فيلم اليمونتير وتبقى ساعتين عاد تحيدها درتها 3 دالمرات وحبست حيت كنت قريت بلي خل التفاح تيفتت اللحم وخفت ترشالي جلدة دكرشي حيت انا كنولد بالعملية
كاين مشروب حارق تيتكون من سكين جبير والقرفة والكامون وطرونش د الليمون وماء غليان درتها مرة ومقديتش نكمل الكاس طيبتو خااااااايبة بزاااااف مقدرتش عليه
شي ايام درت طرونش دالليمون مع ماء غليان وخليتو حتى دفى شي شوية وشربتو على الريق ولكن ماكانتش شي نتيجة واااضحة
بالنسبة لتصغير المؤخرة درت وصفة غزااالة وهي عبارة عن الزنجبيل طري محكوك تنزيد عليه زيت الزيتون ونديرو يغلي 3 دقائق ونطفي عليه ملي يبرد كنصفيه ونحتفض بالزيت تندهن منها ملي نجي نلعب الرياضة
انتضروا تقريري فالليل ان شاء الله باش تعطيوني رأيكوم فيه
في وديعة الله حبيباتي
الفطور: كاس حليب + خبزي الخاص + عسل
الغداء: سلطة خضر كبيرة + 3شديقات كفتة بمطيشة
العشاء: كراتان الخضر وكاس اتاي ناقص سكر
الماء: 2,5 لتر
الرياضة: مشي في المنزل مدة 40 دقيقة