ورشة تريكوات كروشي متجددة ان شاء الله.

السلام عليكم البنات .
الجزء الثاني من الشرح .

من بعد ما كملنا البانضة اللي في اسفل التريكوكتجي بحال هكدا

نخددمو فوقها سطر اعمدة ثم سطر حشو سطر اعمدة سطر حشو نستمر هكدا حتى نوصلو لتحت الابط.
يعني غنعبرو من تحت الابط حتى للطول اللي بغينا في التريكو ونحبسو.

السلام عليكم اخواتي المرحلة الثالثة من الورشة تفضلو بسم الله.
من بعدما كملنا الجزء الثاني حصلنا على مستطيل اللي كيمثل الامام والخلف الان غنخدمو كل جزء بوحدو (متقطعوش الخيط) لهدا غنقسمو المستطيل بهاد الطريقة

حيث مجموع الجزئين الصغار اللي هما الامام يساوي الجزء الكبير اللي هو الخلف.
نرجعو بالخيط عادي وقبل منوصلو للعلامة اللي بالاسود نخدمو 3اعمدة براس واحد شوفو الباترون اللي عندها قياس صغير تخلي 3 الغرزات قياس متوسط 5 كبير 6او7.


نتبعو الباترون الفوق كيف ما هو وملي تبقى 5 او 6 سم

نبداو نقصو للكول نتبعو البارون التحت واللي عندها قياس كبير تزيد عدد الغرز اللي كنقصو في الاول.غنحصلو على هاد الشكل.

نفس الخدمة في الجهة الاخرى.ها هو الشكل

نخدمو الخلف ونقصو الغرز في الابطين بنفس الطريقة ديال الامام وملي تبقى لينا 2 سم نعملو حردة العنق في الخلف بحيث نحسبو عدد الغرز اللي في الكتاف في الجهة الامامي هو اللي نخليوه في الكتاف للخلف والغرز اللي في الوسط نقصوها تكون حفرة الخلف شوفو الصورة

الشكل اللي غنحصلو عليه

التريك غيتطوى بهده الطريقة وخ هاد الصورة باقي مخدمتش الخلف غير باش نوضح ليكم.

هده بعض الصور الخاصة بطريقة عمل الكمام.
حاولت نرسم الباترون د الجناب فين كنزيدو وكنقصو.

هاهما الكميمات غنلصقهم وغيبقى غي الفينيسيو

ايوا لصقت الصدف نقيت الخيوط ديتو للمصبنة فوررو وبس ههههههههههههه ليولي تكشيطة.
ها البطل


وهادي قبعة خدمتها اليوم وعجباتني قلت نحطها ليكم.
ايوا طلقو راسكم دغيا نبدوا التريكو التاني را ولدي شداتو الغيرة.

جزاك الله خيرا اختي الهام

امين اختي راجية .
حتى نكمل الموديل الاول ونبداو الثاني في نفس الموضوع ان شاء الله.نزلتهم باش البنات يتحمسو ههههههههه سيسبانس.