نصائح لكل حامل من تجربتي الخاصة مرحبا بيكم

اول حاجة فمرحلة الحمل ضروري تدهن البطن والصدر .انا مكنتش كندهن حتى فات الفوت عاد عرفت وكنت كنغوت ونضرب برجلي فالارض وتفلحلي الراس فاش كنت كنرضع فنصيحة الدهين تم الدهين.
فاش تقربي تدخلي لشهرك الغزالة خاصك تكوني موجدة كولشي بما في دلك حوايج البيبي دابا نهدرو عليهم من بعد وحوايجك لي خاص يكون من ضمنهم بوديات كيتحل بصداف من الفوق باش مطلعيش حوايجك اترضعي ويدخلك البرد وماكاين ما اسوا من داك البرد يلا دخل لنافسة صعييييييييييب باش يولي يخرج وسوتيانات وبوديات تاهما كيتحل من القدام وفوط صحية من الحجم الكبير جدا راهم موجودين فمرجان وخاصين بالنافسة .واللي غتولد فسبيطار الدولة تدي معاها شي زيوفة كبار غي شي بيجامة قديمة قطعيها طروف مقادين حيت كيطلبوهم وفش كيكمل بيهم كيترماو.ومن الافضل تكوني داية معاك غسول المنطقة الحساسة بحال سيبتيفون او جينو جي ودي شيتة دسنان ا دونتي فريس وشي قلم باش تكحلي حيت غيجيو ناس يباركولك.ودي معاك كدلك درة دحياتي باش تجمعي راسك ضروري ضروري.
وهادي صورة دالسوتيان لي دكرت

بالنسبة لسلو والحلوى لي غايساوبهم ولي غيدفعهم قبل مايدخل شهرك بشوية باش يبقاو مزيانين حيت غي توصل لتاسع خاصك توقعي اي نهار تولدي فيه وحتى ديك لعيبات دليدغاجي كلشي يكون واجد والصاك مجموع.
دابا دخلت ازوينة لتاسع وفييييييه مايدار اولا لمشي ساعة فنهار انا شي مرات كنت كنتمشى غي فصالون ولكن برا احسن ولمشي مزروب شوية.تبداي تشربي القرفة مع الحليب فصبح وكاين بعض الاخوات كينصح بعدم تناول القرفة. ويلا كان فالامكان الزعفران الحر حتى هو انا خديت 50 درهم كفاتني.هدشي كامل لي كلت كيسهل الولادة بادن الله+الحركات الرياضية ط§ظ„ط®ط§طµط© بالحامل كتشدي مثلا فصور او شي حاجة واصلة لنصف الطول ديالك وتفرقي رجليك وتبداي تهبطي وطلعي نتمنى يكون مفهوم.واللي مشات عند الطبيبة وكالتلها البيبي ممقبلش معليها غي بالحبو بحال الدري الصغير عن تجربة شخصية.و واحد النصيحة مهمة وغي سمحولي على الجرأة ولكن راه فيه منفعة خوتي حاولو ما امكن ديما تزولو شعر الفرج كلما ناض راني شفت شي مناضر فالطبيب ما فيهم ميتشاف فرملية كتزول لوحدة برازوار قبل ماتولد و وشي وحدين ولدو هكاك وتغرزو بداك الزغب وتعدبو بزاااااااف راني عارفة غيتشوكلكم لحمكم ولكن من الافضل تعرفو شنو كاين.
اوا اولا غتعزلي الحوايج دالبيبي لي غيلبس فلول بوحدهم منين يخرج من الكريشة على خير ان شاء الله.باش ميبقاوش الفرمليات كيضيعو الوقت فالتقلاب ويكون البيبي ضرب البرد جمعيهم فشي ميكة غي تكولك مديهوم ليها.فاش يجيك الوجع دالولادة غتشربي العسل الحر مقدار فنجان صغير حيت كيسهل الطلق وشي تميرات باش تقوي قلبك عاد سيري لطبيب ودي معاك التمر نيت يلا كنت غتبقاي شي شوية عاد تولدي مرة مرة كوليه.
الحبيبات ديالي فاش يجيكم الوجع حاولو متغوتوش حيت الجهد كيمشي ومتقدريش تزحمي يعني ديري امممممممممممممممممممم صااااافي بلا غوات واش يكولولك دخلي تولدي كولها عفاك نمشي المرحاض بعدا وخ ميكون فيك والو حيت شحال من وحدة كتبغي تزحم وكيخرجلها كلشي حشاكم من بعد توكلي على الله وسيري لبلاصتك والدعاء الدعاء.وواحد النصيحة منين تكوني توجعي فالبياص مترديش راسك اللور حيت كيخرجو ليكواطخ ردي راسك القدام.وفاش تكولك الطبيبة متزحميش مااااااااتحميش وفاش تكولك زحمي زحمي ومتوقفيش حيت يلا حبست تقدري تجيفيه لا قدر الله انا ماشي كنخلعكم وانما كنبهكم وداكشي لاش كلت متغوتيش باش متسخفيش ونت كتزحمي.اوا الحمد لله خرج البيبي على خير ومتصوريش الفرحة لي غتحسي بيها غتنساي كلشي كلشي.ااااااه خصك تكوني لي كوش دياولك معاك متنسايهومش.اوا فاش يدوك لبيتك اول حاجة ديريها غتحزمي كرشك مزيااااااان اما بشي شال طويل او السمطة لي كتجمع الكرش تكون افضل ناس زماااااااااااااان كانت المرا كدير البلغة دراجلها اتجمع كرشها ههههههههه وشي اخوات كالك من الافضل حتى دوز 3 ايام بينما رجع الرحم لوضعه.اوا تنضن عرفتو علاش باش متخرش الكرش حيت الكرش دلولادة يلا خرجات معمرها كتولي ترجع كيكانت.
ونصيحة اخرى بالنسبة لي والدة طبيعي بالغراز من اول لحضة فاش تبغي تكلسي فسريرك متكلسيش مايلة بالعكس كلسي عادي على الغراز حيت من بعد مغتقدريش تكلسي عليهم يلا مثلا جاو عندك الناس يباركولك مغتكلسيش مايلة نتمنى تفهموني.
وعااااااافكم متاكلوش البنان راه يقدر يدير امساك ومع الغراز راه واعر.والليمون وكاين ليكولو لتشين او النداري من الافضل متكلوهش حيت متيخليش الغراز يبراو دغية. وخدي معاك ميكات متوسطين باش ديري فيهم لاكوش وعاد ترميها.من قبل الولادة غيخصك تكوني موجدة هاد المسائل لكتخص غسل المنطقة ولي كاتعاون الغراز يبراو بسرعة غتحتاجي قشور الرمان والدباغ والشيح والخزامة تغلي القياس وتصفيه وديريه فقرعة فتلاجة فينما تكوني داخلة لتواليت دفي شوية ودخليه معاك وستنجاي بيه من بعد متكوني نضفت المنطقة بالغسول الخاص وليغيكونو كتبهلك فطبيب فاش تجي خارجة مع بعض الادوية.وفاش تكوني فبيتك او فدار مرة مرة نوضي طلقي رجليك شوية وتمشاي باش ميبقاش دم محبوس فالرحم هادي كانت نصحاتني بيها واحد الفرملية الله يجازيها بكل خير يا رب.بالنسبة للمساخن متشربيهمش هككاك راه تيديرو نزيف لا قدر الله راهم فرفيسة كافيين.
لادرار الحليب انا شخصيا كانت الام ديالي كطيبلي التشيشة ةتلوح معاها شويش دلحلبة وكنفطر بيهم على الصبح هما وتميرات وتبركالله كان الحليب كيفيض مني.اضافة الى حبة حلاوة ونافع ناخد شوية ونديروه مع الحليب سخون وفاش طلق نصفيوه ويشرب واما يكون داكشي مطحون ونشربوه بلا منصفيو.بالنسبة لللنساء لي معندهومش الراس ديال الثدي ضروري يخدو فونتوز راها كتباع فالفرماسيان كتساعد باش يخرج الراس.
واحد النصيحة للنساء لولدو بالغراز فاش غيبداو يبراو كيبقاو كياكلو وكتبغي تحكي ومكتقدريش ونصحاتني الام ديالي الله يخليها ليا باش ندردر شوية دلحنا على لاكوش عاد نديرها وفعلا رتاحيت بزاف من الحكة علما ان الحنا ديال الشعر دلعبار ماشي هاديك لي كيكونو زايدين فيها الدوليو او شي مواد كيميائية.كيبانلي نتاهيت من ظ†طµط§ط¦ط­ الام يلا تفكرت شي حاجة اخرى دبا نضيفها من بعد ان شاء الله.

نصائح خاصة بالرضيع

غنبداو بالصاك لي غتدي معاك ان شاء الله
صاك ديال الرضيع غنديرو فيه ما يلي
2 بوديات بالطريطقات من لتحت
2سراول دلتحت
2 سوفيتمات بلا كم او نص كم
فوطات صغار
رياكات 2 او 3
2 لبيسات باش يدوز ديك الايامات +وحيدة دلخروج
ليزار مطروز+بطانية
تقيشرات وليكات دلقطن باش ميقمش وجهو
والكماط
وطبعا ليكوش وليلانجيت بيو بشرط غنستخدموهوم غي تما اما فالمنزل ضروري الما وصابون الحجرة.
بالنسبة لداكشي د دوش لا داعي منو حيت هما كيتكلفو بكلشي
*للاشارة هادشي لي دكرت كيتغير حسب الجو وعلى حسب المدة لي شبفت راسها تقدر تزيد على 3 ايام تسيفط شي حد يزيدها يلا خصاتها شي حاجة من بعد.

يلا لاحضتو ان مدكرتش طاكية دراس لاحقاش ممزيانش نولفو البيبي السخونية فراسو باش ماشي نهار نزولوهالو يدربو البرد ويتروح انا شخصيا مدرتهاش الا بعد الدوش غي واحد الشوية وكنزولهالو والحمد لله ملقيتش معاه مشكل.
متنسايش اللباء يلا كنت غتولدي فكلينيك راهم كيديو لبيبي يبات عندهم فهاد الحالة طلبي انهم يجيبوه ترضعيه عاد يديوه ولي معندهاش الراس دثدي راني دكرت الفونتوز تكوني عقمتيها من قبل جبدي بيها اللباء وعطيه لبيبي بمعيلقة او فالرضاعة.
فاش يكون البيبي حداك ونت كطوي الغطاء من الافضل خرجي وطويه بعيد عليه حيت شويييييييييييييييية دلبرد كياتر عليهم وكيتخنقو.
بالنسبة للغازات لي كيصيبو الدراري الصغار اولا نبعد من المصدر يعني منكلوش ديك الشي لي كيسببهوم بحال القطنية والليمون والكروم واللفت غي بينما تقاد السيستيم دلجهاز الهضمي لبيبي.
وتقدري تاخدي هاد الاعشاب يكونو منقيين وغسولين وناشفين عندنا شوية من كروية.الكامون الصوفي.الزعتر.اللويزة.حبة حلاوة.النافع.نديرو الكل فقريعة قية فينما حسين بالبيبي فيه شي وجع ناخدو شوية ونديرو عليه الما طايبونغطيوه يطلق ونصفيوه ونعطيو لبيبي جهد 2 معيلقات صغار لا اكثر.
طريقتي فتعقيم الرضاعة كنخد كسرونة ونعمرها بالماء ونزيد لوازم الرضاعة+شرائح الليمون الحامض مكيخليش فيها حتى ريحة.ونخليوهم يغليو شوية.
انا فاش كمل 4 اشهر بديت كنحيد التعقيم تدريجيا مرات كنعقم ومرات كنغسلها عادي فاش كمل 5 اشهر زولتو فمرة.
بالنسبة للماء لي نشربو للبيبي ف 6 اشهر الاولر هو الماء المعدني او الماء المغلى مسبقا.
من فوائد اللويزة للبيبي تتخليه ينعس وكتهدئو وكتطلق الكرش بالنسبة يلا لقينا لبيبي عندو امساك.

والسلام عليكم