مملحاتي بالعجينة الذهبية الراااااائعة

نبدأ مع:

+++ المقادير:

مقادير العجين:

في الصور ضاعفت المقادير

+375غ دقيق ابيض
+دانون طبيعي
+ملعقة كبيرة خميرة الحلوة
+ملعقة كبيرة خميرة معجونة
+60ملتر زيت
+120 ملتر حليب أو 125ملتر
+ملح
+3ملاعق كبيرة سنيدة

مقادير الحشوة:

+كفتة متبلة بالملح, كمون, سكنجبير, سودانية, تحميرة, ربيع, وبصلة محكوكة او مقطعة رقيقة جدا.
+زوج بصلات كبار مشلضين
+ زيت بلدية
+ جوج فصوص ثوم
+فرماج مثلث

للتزيين:
سانوج, جنجلان, فرماج احمر, بيضة مخفوقة.

+++الطريقة:

نخلط كل مكونات العجين وندلكوها مزيااااااان ونخليوها تخمر.

في هاد الأثناء نوجدو الحشوة, نعملو الزيت البلدية تسخن قليلا على النار ونرميو فيها البصلة والملح وشوية ابزار والثوم معصر, نخليوها حتى تذبل ونضيفو الكفتة وحنا كنخلطو ونحاولو نفرتوها باش ميبقاوش طروفا طبار ديال الكفتة, منين طيب الكفتة وتنشف الحشوة من الماء, نطفيو عليها ونخليوها تبرد تماما.
ندوز لتشكيل مملحاتنا بالأشكال اللي نحبو, وحتا الحشوة لكن الاختيار, ممكن تعمرو باللي متوفر وباش ما حبيتو.

الشكل الأول: مستطيلات مزينة بالفرماج الأحمر

نطلقو العجين بالدلاك ونقطعو مستطيلات متساوية, ندهنو ليها الجناب ببيضة كاملة مخفوقة ونعمروها بالكفتة في الوسط بشكل دائري, ندخلها الفرن على 200 درجة منين تخرج نخليوها شوية تدفا و نعملو ليها قبصة فرماج احمر في الوسط.

الشكل الثاني: وردة بالسانوج والزنجلان معمرة في الوسط بالحشوة وفي الدوائر المحيطة معمرة بالفرماج المثلث.

نحشيو 5 دوائر بالفرماج, وكرة تكون أكبر نحشيوها بالكفتة, وهي اللي غنعملو في الوسط, ندهنوهم بالبيض ونرشو زنجلان وسانوج والى الفرن.

الشكل الثالث: اصابع بالنجيمات والزنجلان
نعملو الحشوة في دوائر العجين مع طرف من الفرماج المثلث ونسدوها على الطول ونزينوها بنجيمات وزنجلان وندهنوها بالبيض والى الفرن.

الشكل الرابع والأخير: وردة بالسانوج

نعمل الحشوة وسط دائرة ونجمعو ليها الجوانب للوسط باش نسدوها مزيااااان, نبسطوها بأصابعنا, ونجيب مقص باش غنقطعو الجوانب كلهم ونقلبو كل جانب كما هو موضح في الصور, ندهنوهم بالبيض ونعملو السانوج في الوسط, والى الفرن.