بديت بالتخمال هو الأول وهادي هيا تجهيزاتي التنضيفية إن شاء الله
تجهيزاتي التنضيفية:
بديت بالمطبخ خويت الرفوف كاملين والدواليب وغسلت بواطات القطاني وحكيت لامينيو بجكيس ولبوطا غلفتها وخويت الخزانة وغسلت لي فيها وعاودت ترتيبها وغلفت لميعنات باش متدخلهمش الغبرة
من بعد صبنت لفراش كولو وهدا هو السلاح ديالي :
الخليط السحري لي خرجلي لمانط كايشعلو + رائحة زوينة …. 2 كيلو تيد ديال لعبار و قرعة شامبوان و الماء مهم الصور كاتوضح كوولشي
قبل التخزين ملي نشفو الملايات حكيت دوف و خلطتها مع الملح الخشن باش مايغملوش و يعطي رائحة زوينة و رشيت فوق منهوم ماء الزهر
بالنسبة للسجادات حككت ليهم المسك
سيجور دوزت عليه وقاديتو
وهدا واحد الطويجين ممم يطيب ومرحبا بيكم ن بعد هاد التخميلة
وهادي لخابية ديالي مبردة فيها لماء
تجهيزاتي المطبخية:
هادي مطيشة نقيت ليها الزريعة وطيبتها وطحنتها وقومتها ودرتها فقراعي وسديتهم وقلبتهم على فمهم باش اتعقموا
هادي التومة شراها لي السي السيد خخخخ بالكثرة باش نصايبها على الطريقة ديال لبلاد
هنا التومة مطحونة ومقومة بالملحة والسودانية والرند وزريعة القزبور وعمرتها فقراعي باش تبقا طول العام
نقيت الجلبانة و الفول و اللوبية و رطبت الحمص و قطعت الربيع و درت كولشي فالبلاستيك و حتا الدجاج غسلتو وقطعتو و درتليه الحامض و الملحة و سكينجبير و درتو فالبلاستيك في المجمد
هادا الحار يممم ههه منقدروش نستغناو عليه
بالنسبة للمأكولات
و هادو نماذج من الاكل لي كانديرو ف ايامات رمضان و بحكم حنا فالعائلة بزااف مايمكنش لي نصور لكم جميع المأكولات حيت ماكانديرش لي يبقالي فالمجمد كل نهار و الخير ديالو ههه
ايوا ي لالاتي هادا خبز الطاجين معمر بالبصلة و الهبرة ديال الدجاج و لا بيبي و الفلفلة و شوية د الشحمة و التوابل و الربييع
ايوا و عجنت العجينة العجيبة ديالي ههههه
كاندير الدقيق و الملحة و الخميرة .. مهم المقادير عاديين غير الطريقة لي فشي شكل …
كانرون المكونات بالما غير كايتخبع الطحين و كانخلي العجينة تخمر و من بعد كانعاود ندلكها
بالنسبة للحلو وجدت أولا العسل :
فيها 2 قوالب السكر +2 كيسان ماء زهر + 2 لتر ماء + 2 حامضات
جهزت الحلوة المعسلة بدل الشباكية
2 مرغرين دايبة + 2 كيلو طحين فورص + الملح غير شوية + الماء للعجين
اخيرا جهزت سلو الصحي لي درت فيه طحين الشعير و الذرة و القمح و الصوجا و ايلان وزريعة الكتان و الزنجلان و النافع و القرفة و القروية و الكاكاو و العسل الحرة و الزيت البلدية و الزبيب و الكاوكاو و اللوز مدقوقين
جهزت التمر ايضا
وأخيرا أخواتي هاد بعض المستلزمات الخاصة
هادو خيطتهوم لبنوتي باش تصلي معايا
وهادو غلافات للمصاحف
وهادي هديتي لكن
وبهدا نكون ختمت التقرير نتمنا ينال إعجابكم وتكونو ستافدتو معيا ولو بالقليل
lahv;jd flshfrm hgj[id.hj hgvlqhkdm gskm 2024
عافاك بغيت الطريقة دالتومة والحار الله اكتر خيرك