مسيمنات معمرين دايزهم الكلام دخلو مرحبا

السلام عليكم و رحمة الله

اليوم انيقاتي جبت ليكم شهيوة ساهلة المغاربة كيحماقو عليها خصوصا احنا المتغربين
بلا ن نطول عليكم نخليكم مع المقادير و طريقة التحضير واخا عارفة كل الانيقات تبرك الله حادكات و كيعرفو يصوبو المسمن
المقادير
العجين: دقيق ابيض و دقيق ممتاز نفس المقدار من الاثنين+ملح+خميرة فورية
الحشو: بصيلة+فلفلة+جزر+كرنب+ كريعة خضرة+خليع+ملح+تحميرة+كمون

من بعد ما نعجنو العجينة نديروها كويرات و نخليوها ترتاح و الخضيرة كنشحروها فالشحيمة ديال الخليع و نضيفو التوابل

نبسطو الكويرات ونوضعو فيها الحشوة

هاهما المسيمنات كيطيبو فالمقلة
التقيلة

هادي ديال ولدي لانه مكياكلش الخضرة
جربوها كتجي ممتازة غير بالطبع المسيمنة مكتبسطش مني كتعمر

و هاكدا كيجيوو

و كما العادة لي دخلات الاولى تمد يديها و تقول باسم الله