مخيخات الخروف مشرملين

مرحبا بيكم موجدة ليكم اليومة مخ مشرمل دايزو الكلام
هههههههههههههههههههه
يا الله بسم الله

المقادير:

4 مخ غنمي
1 معلقة كبيرة مركز مطيشة
5 سنتل ماء
4معالق كبار معدنوس وقسبور مقطعين رقاق
3 رويسين الثومة
1 معلقة صغيرة تحميرة
1 معلقة صغيرة كمون
1/2 معلقة صغيرة فلفلة حارة مدقوقة
1/2 معلقة صغيرة ملح
1/2 معلقة صغيرة ابزار
10 سنتل زيت زيتون
5 سنتل خل
1 ل ماء ساخن

الطريقة

نصبوا الخل في الماء الساخن ونحطوا فيه المخيخات لمدة 2 دق ونستقطروهم
نحيدوليهم الجلدة غير بالشوية ونحيدوا العروقة الصغيورين
في مقلاة طيفال نديروا مركز مطيشة مخلط في شوية الماء
نزيدوا عليه الربيع الثومة والتوابل والزيت ونخلطوا
ونحطوا المخيخات يا اما مقطعين ولا من الأحسن صحاح
ونخلوهم يتشربوا الخليط لمدة 15دق على عافية مهيلة حتى تعقد المريقة
ونقدموهم بالصحة والراحة