لي جوباتني الله يرزقها حسن الخاتمة والجنة

بنتك مازال صغيرة بزاف ومن حقها أنها تكون متعلقة بيك بزاف ، هادشي طبيعي

يمكن يبان لك انني كنبسط الأمور ، ولكن راح هذا هو الواقع

الخطأ لي كنطيحو فيه حنا الامهات اننا في بعض الأحيان كتأثر فينا الهدرة ديل الناس ، وهادشي كنهدر عليه من واقع تجربة

نعطيك مثال ، أنا فاش كانت بنتي صغيرة ، حتى هي ماكانتش كتبغي تمشي عند حتى شي حد من غيري أنا ، وحماتي دائما تقول لي هاد البنت عندك مفششاها بزاف ووو- … ولكن حياني الله حتى شفت كيفاش بنت لوستي فاش كان عندها نفس السن لي كانت كتعاتبني فيه حماتي على بنتي ، وهاد البنية ماكتهداش من الفشوش والبكاء إدا شافت شي حد براني ، ماشي غير باش تسلم عليه ، وفاش كندير الملاحظة ، حماتي كتقول لي : ايوا راها باقا صغيرة …..

شوفي أختي ، بالعكس ، الحمد لله أنه عندك الفرصة أنك تقابلي بنتك بنفسك ، و أن بنتك متعلقة بيك ، راه غير البارح سبحان الله قريت فالمنتدى على واحد الأخت كاتشكى أنه بحكم عملها إضطرات أنها تخلي ولدها عند حماتها ، وكتقابلو عمتو ودابا كيقول لعمتو ماما ، ايوا شفتي !!

دابا ياختي يجي وقت دخولها للمدرسة وتدخل حتى هي مسيكينة فدوامة القراية وتولي تقول ياربي غير تجلس معايا شوية

عيشي اللحظة ، وتمتعي بهاد السن الدهبي ديال بنتك ، وخليها قريبة ليك وفرحي بيها ، راه أنا دابا لي كنهدر معاك ، وليداتي كيمشيو للمدرسة من 8 حتى 4 ، كيجيو مساكن مهلوكين ، يتفرجو شوية ، ياكلو، يقراو ، وينعسو ، ووليت كنساين الويكاند باش نحتفل بجمعيتنا كاملين 🙂

عيشي كل سن مع حلاوتوو ورخفي راسك ، وماتديهاش فكلام الناس، ديري لي كتحسي بيه وكترتاحي فيه وكيسلكك

ونتمنى مانكونش طولت عليك

وعافاك ماتبقايش تضربيها بزاف 🙂