السلام عليكم و رحمة الله
اخواتي كيف جا فالعنوان
هنا ان شاء الله غنعرفكم على اعشاب و نباتات
تستعمل فالمطبخ المغربي من قديم الزمان
البعض باقي كيعرفها ولكن للاسف الاكثرية نساوها او تناساوها
مع ان قيمتها الغذائية و الصحية كبيرة بزاف
و لله الحمد متوفر فمتناول الجميع لانها مكتحتاج لا زراعة و لا رعاية
كتنبت بوحدها فكل تراب المملكة لله الحمد
غنبدا بالحاجات للي كتسمعو اسمها لكن مكتعرفوش شكلها
1 الرجلة او الترجلة
بالفرنسية pourpier
كتتكال كلها بالاوراق و الساق يعني غير تغسل و تتكال
اما نية فسلطات او تتقطع و تتشرمل بحال الخبيزة
2 الهندباء
بالفرنسية laitron
غترفيها غير بالوردة ديالها
كتكون صفراء و لما كتيبس كتولي بيضاء
ديك للي كنسوطو عليها و كطير زريعتها
اوراقها منوعة كتكون باشكال منوعة حسب حجمها
و كتكال نية فالسلطات او تتشرمل بحال الخبيزة
3 الجرجير
او كيف كنقولو ليه روكيت
بالفرنسية roquette
الوردة ديالو كتكون بيضاء ب 4 بتلات و مسحة ڭرونة غتعرفيها بالشوفة
اوراقو كتختالف فالشكل و فالحجم حسب كبرها يعني فيها اشكال منوعة فنفس النبتة
حتى هو يستعمل فالسلطات ني او يتشرمل
4 الڭرنينة
مكنعرفش ليها شي اسم اخر للاسف
كتغسل و تتنقى كيف كنقيو الخرشف ،
كيكون فيها الشوك بحال ديال الخرشف تماما
غير هي اصغر و مذاقها كيكون حلو على الخرشف ،
ممكن تاكليها نية فسلطات او تشرمل
اوتخضري بيها كيف كنعملو مع الخرشف و اللوبية
5 السلق
بالفرنسية Blette
كيتكال ني فالسلطات بالساق و الاوراق
او كيتشرمل كيف الخبيزة
او كيتحشى كيف اوراق العنب
6 السبانخ
بالفرنسية épinard
كيتكال ني فالسلطات بالساق و الاوراق
او كيتشرمل كيف الخبيزة
7 الخبيزة أو البقولة
بالفرنسية mauve
كلكم عرفتوها
كل هاد الورقيات كتعمل بيها عدة اطباق
ان كان سلطات
او پات
او طاجين
او حتى كسكس
…
يعني انتي وذوقك ممكن تعمليها كيف بغيتي و تستافدي من مكوناتها
و طبعا كلها ليها عدة استعمالات و فوائد غير كتبو الاسم فمحركات البحثو غيعطيكم فوائدها الصحية
ان شاء الله تتعرفو على النباتات بالصور
و لابد متكونو سبق و شفتوها فجنبات الطريق او لو درتو شي خريجة للغابة
راه كلها كتنبت بوحدها فجنبات الجرادي و فالغابة
و ممكن تاخذوها و تزرعوها عندكم فالمحيبقات او فجريدة
طبعا كتباع فالمارشي الكبير لكن كتكون ربيطة صغيرة بثمن كبير
ان شاء الله يكون الموضوع مفيد
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
ggHo,hj ggd ;ds,g,ugn hg[v[dv<hgik]fhx<hgv[gm>>fhgw,v lg[ hgڭvkdkmfhgw,v hg[v[dv hgvplm hgik]fhx
جزاك الله خيرا
كنت أفكر في جمع ما قلته عن الخضراوات الورقية و لكن سبقتيني ههههه
جزاك الله خيرا أختي و نجيمات على هاد الموضوع المهم جدا، يا ريت تثبيته، لإفادة الكل
اللهم زدنا علما و معرفة و جزاك الله عنا كل الخير
عندي سؤال واش الجرجير كاين في السوق
و عليكم السلام ورحمة الله وبركاته
بارك الله فيكن جميعا حبيباتي
كل باسمها
ردودكن فرحاتني
الله يفرح قلوبكم
و يجزاكم عني خيرات الدارين
على دعواتكن الطيبة ياطيبات
الله لا يحرمني منكن