كيكة ساهلة وفنيونة بصلصة الليمون

26/01/2019

السلام عليكم
منين كيخرج اليلمون كنبقا نتفكر كاع الوصفات لي عندي بالليمون.البارح قلت نديرهاد الكيكة هي عادية ويني كتجي لديدة ط¨طµظ„طµط© اللمون.
بسم الله.للكيك غادي نحتاجو ل 4 البيضات+فاني+3 خمارات+1+ ك مويان سنيدة (قد ديال العنبة را باين فشي صور)+نص ك زيت+نص ك حليب+نص كاس دانون كريمي بالخوخ (ضروري تيجي غزال مع طيبة الليمون)+2 ك ونص طحين+م كبيرة نيدو+م ك كونفتور (انا درت ديال لمندرين)+ قشرة لمونة محكوكة (نسيت ماصورتها)

نطحنو الكل فمولنكس ما عدا الطحين و الخميرة وقشرة اللمون

نفرغو الخليط فاناء ونزيدو الطحين مغربل مع الخمارة نحركو عاد نزيدو قشور اللمون باش تبقى نسمتهم باينة فالكيك

نعملوها فالمول مدهون ومرشوش طبعا (انا درت هاد المول هادي سنيييين ما درت فيه الكيك مسكين ههه)

هاهي فاش طابت خليتها شوي عاد حيدتها من المول

كتجي طالعة تبارك الله

دابا نوجدو لاصوص باش نسقيوها من الفوق
غادي نحتاجو ل نص ك دانون خوخ لي خلينا من الكيك+ عصير لمونة ونص+ م ك كونفتور+ 2م ك نيدو(نسيت ما صورتو ) على فكرةهاد صلصة كتشبه لديال منال العالم غير انا غيرت فيها شوي

نخلطو الكل مزيان الا نيدو ونديروه يغلا فوق العافية

نحيدوها من العافية ونزيدو 2 م ك نيدو ونحركو مزيان ونخليوها حتى تبرد هي والكيك عاد نخويوها عليها حنت لا درناها وهوما سخان غادي يشرب الكيك ومتجيش باينة فوقو

ملي تبرد نخويها بشوي بشوي على الكيك كامل

صافي ونخليوها فالتلاجة حتال الصباح ونهزو بالمعلقة لاصوص من جناب الطبسيل ونعاودو نخويوها فوق الكيك (البق مايزهق هههه)
نصيحة. اي كيك يستحسن يوجد ب 24 س من قبل عاد يتكال تيجي احسن.
هاهي فالصباح

نمسحو الطبسيل من الجناب باش نقدموها

وهاهي بالصحة والراحة لي عجباتها دور معايا ههههه ولي ما عجباتهاش الدنيا هانيا