كراطان الخضرة من مطبخي

بطاطا
كرعة خضرة
مطيشة

لصلصة البشاميل غنحتاجو

القليل من الزبدة
معلقة كبيرة نشا
ضرس تومة
شوية الربيع
جبن مبشور
كاس دلحليب،
ملح
ابزار
شوية جوز الطيب

درت البطاطا مع الكرعة فالكسكاس يتبخرو شوية، ورشيت عليهم شوية الملح والإبزار
من بعد ماوجدو، كنت وجدت من قبل لاصوص بيشاميل
درت الزبدة فكاسرونة حتى ذابت، وزدت عليها النشا وحركتهم مزيان حتى تجانسو مع بعضياتهم، عاد زدت عليهم كاس دلحليب، ودرت مليحة وبزار ولكوزة، وبقيت تنحركهم حتى تقال المزيج وولى عامل بحال لكريمة، من بعد حيدتها من فوق لبوطة، وزدت عليها التومة محكوكة والجبن والربيع
من بعد مندير طبقة لولى بطاطا ونكب شوية البيشاميل، والطبقة التانية الكرعة ونكب عليها البيشاميل، تم البطاطا تاني ولا صوص بيشاميل، وفي الأخير ماطيشة وكنخوي اللي بقا ليا من لاصوص، وكندخلهم للفران يتحمرو
هاهو الشكل النهائي ديالو

وهنا قدمتو مع الدجاج مشوي فالفران، مع مطيشة والبصلة مشحرين