قصة ولادة طفلي محمد عمار بالتفاصيل المملة

جاو الطبيبات و انا باقة كا نبكي و ونغوت طلبتهم على الابرة عاد وافقو عليها و لكن نتسنى واحد ساعتين أخرى لأن الوجع عندي ثقيل و ما خاصش يثقلوه اكثر … و فالانتظار حلات ليا الطبيبة السقية و سمعتها قالت للفرملية meconium يعني البراز ديال البيبي و انا نتخلع سولتها واش القضية خطيرة و قالت ليا ما تخافيش راه دقات القلب عنده مزيانين و را حنا حاضيين
ايوة بقيت كا نتلوى ديك المدة و جا وقت تبدال الفرمليات، مشات هاديك صاحبتي المسيحية و جات وحدة اخرى و مسكينة ما مشات حتى طلبات ليا المسامحة قالت لي الى قصرت معاك فشي حاجة … بقيت كا ندعي معاها

اخيرا كانت شي 5 د العشية جا البناج وخا راجل ما بقيتش عقلت على شي حشمة الله يسمح لينا بغيت غي السلاكة قلت للفرملية تقاد ليا اللبسة ما امكن و بقى ظهري عريان للإبرة و صافي .. سولت البناج واش بالصح كاين احتمال يوقع ليا شلل قال ليا آه قلت لو ماشي مشكل غي عتقني ووقعت الورقة و قريت الدعاء اللي كانت وصاتني بيه واحد الاخت الله يثبتها على الشهادة : بسم الله الدي لا يضر مع اسمه شيء في الأرض ولا في السماء …. الحمد لله البناج يدو خفيفة دغيا كمل و قال لي ارتاحي و استمتعي بالولادة ديالك و عاد بديت كا نرتاح تدريجيا ما عقلت على راسي حتى جاو الطبيبات ثاني كا نسمعهم كا يقولو المريضة ناعسة فيقوها تولد هههه ديك الساعة كانت 6 د العشية و وصلت التوسع 10 سم يعني وقت الدفيع

و قالو ليا الوجعات باقين قلال و ضعاف بزاف ايوة وخا هكداك جلسوني فالفراش قالو ليا جربي تدفعي و نشوفو… ملي كا تجي الوجعة كا تبان ليهم فالمونيطور لأنني مبنجة من التحت كا نحس فقط ملي كا ندير يدي على كرشي كا نلقاها قاااصحة كا نعرف انها وجعة …. ايوة كا يقولو ليا دفعي بحال الى فيك امساك هههه انا عييت ما ندفع والو و الطبيبات كا يقولو ليا راكي ما كا تدفعيش بالطريقة الصحيحة

بقيت هكداك فالدفيع 3 د السوايع و نصف …. حتى تهلكت على خاطري و انا كل دفعة كا ندعي يا ربي خلصني يا ربي ارحمني و شفت الطبيبات بداو فالمشاورات بيناتهم قال ليك قربات تكمل 4 د السوايع فالدفيع خاص نتاخدو شي قرار ….. اييييوة انا غي سمعتها متت بالخلعة جاتني بحال القضية د الافلام واش نعتقو الام ولا الطفل هههه و الاسوء قالو ان حتى العملية القيصرية غا تكون خطيرة لأن راس البيبي هابط بزاف و بقاو كا يشوفو فبعضياتهم

واحد الساعة اقترحات واحد الطبيبة انها تحيد المفعول د الابرة د الظهر باش يحمى فيا الوجع وانا نخاف ههه قلت ليها لا صافي انا غا ندفع مزيان غي خلي الابرة ههه نخافو ما نحشمو هههه ايوة ملي جات الوجعة التالية بديت كا ندفع حتى كا نحس عينيا غا يطيرو و عاد الطبيبات قالو ليا صافي عاد وليتي كا تدفعي مزيان و جات وحدة كا تعاونني كا تدفع من فوق كرشي بيديها و انا نشد ليها فدراعها و نزيييير عليها مسكينة و هي صابرة هههه حتى فاتت الوجعة عاد قلت ليها سمحيليا قالت لي ما عليش هههه

ايوة هي هاديك بعد عدة دفعات عاد خرج الراس و صراحة ما حسيتش بيه، و لكن حسيت ملي جبدو البيبي كامل حسيت تماما وخا البنج بحال الى كا يجرو جزء مني و عااااد تنفست الصعدااااء

و لكن البيبي ما بكاش و شفتو ازرق مسكين طارو بيه للانعاش و عطيتها للبكاء و كا نسول الطبيبات مالو ما بكاش و هوما قالو ليا ماشي ضروري انه يبكي كاين اللي كا يتزاد بلا بكاء من بعد قالو لي ندفع مرة ثانية دغيا خرجات المشيمة و جلسات الطبيبة تخيطني و انا مخلوعة و كا نبكي عاد جابو ولدي وراتو ليا الفرملية غاسل و ملوي فالفوطة ملي شفتو عاد ارتاحيت

و لكن مع العياء ما سولتش فيه مسكين شي ساعة تقريبا على ما كملات الطبيبة من الخياطة … و قالت لي احسن حاجة انك خديتي هاد الابرة اما راكي باينة ما كنتيش تصبري لهاد الخياطة … قلت ليها فخاطري راني عارفة راسي هههه

ايوة بدى كا يحيد مفعول الابرة وانا باقة فوق الطبلة …. جاتني الدوخة حشاكم قلت للفرملية جابت ليا فاش نرد حشاكم و مع الكرش طايبة بالوجوعات ملي كا نرد كا نحس براسي كا نتقطططع …. و شداتني واااحد الرعدة سناني كا يتسمعو و كا نحس بالفراش كامل كا يرجف و قالو ليا الفرمليات راه طبيعي بسبب فقدان الحرارة د البيبي و السائل السلوي و المشيمة …. غطاوني و خلاوني ارتاحيت شوية … حتى فاتني الحال عاد عقلت على ولدي مسكين قلت ليهم يجيبوه ليا رضعتو شوية

عاد طلعوني للغرفة ديالي انا و البيبي … و جاتني السخانة ديك الليلة + التبوريشة و لكن ما عقلت على والو نعست مع العياء والبيبي دار معايا زوين ما فيقنيش بزاف بالليل …

اما الصباح اللي اجيو تتفرجو فيقني الألم ديال الغرااااز مع 6 د الصباح عاد بديت كا نحس بيهم ألم رهييييب كا نغوووت بحال الى عاد كا نولد و في نفس الوقت باقية رجل وحدة مبنجة و الاخرى ثقيلة … ايوة جاو الفرمليات جات الطبيبة تقلبني ناااري على يدين عندها ما فيهم رحمة بقيت كا نغووووت و في نفس الوقت رجليا مشلولين ما عندي كي نهرب ليها هههه و هي كا تقول ليا ضروري نشوف واش الغراز هوما هادوك …. من بعد قالت لي ما كاين التهاب ولا غيره هدا ألم طبيعي غي صبري و انا كا نقول ليهم لا ماشي طبيعي لأن بوحدي اللي كاسرة الدنيا بالغوات ههه ايوة عطاتني الفرملية كينات مهدئة … والو .. من بعد قويلبات و دارت ليا ابرة في جنبي حتى هي والو

و في نفس الوقت حسيت براسي مزيرة باغة نمشي للطواليط و الفرملية قالت لي كي غا تمشي و انت رجليك باقين ميتين جابت ليا الاناء اللي كا يستعملوه للتبول فالفراش و خلاتني شحااال و جات لقاتني ما درت والو ههه قلت ليها والو نمشي للطواليط جيبي كرسي متحرك و انا نسلك راسي ايوة داتني غي انا جلست عل الكرسي د الطواليط صافي وليت كا نسمع اصواتهم بحال الى كا يهضرو في بئر هههه و كا نحس براسي جاية للارض حتى حسيت بالماء كا يتخوا عليا عاد فقت و كا نسمعهم كا يقولو ليا شربي شربي و انا كا نقول فخاطري آش نشرب هنا هههه لقيتهم دارو ليا عصير في فمي عاد صحصحت شوية بداو كا يغوتو عليا علاش أصريت نهبط من الفراش و انا باقة مبنجة

والغريب ان داك المشي حيد ليا الالم ديال الغراز كليا و سكتت بعدا من الغواتات هههه

الحمد لله كانت تجربة مزيانة بقيت 3 ايام فالسبيطار فقط بسبب ديك السخانة باش يراقبوها اما كان المفروض يومين فقط

الحاجة الوحيدة اللي آلماتني هي ملي كنت فالغرفة ملي وليت شوية لاباس نضت كا نجمع الروينة اللي دايرة بيا و كا ننضم زعما، و كانت حدايا واحد النفيسة و معاها أمها شاركين الغرفة و فارقين غي بالستائر، ايوة شافتني كا نتحنى و نجمع قالت ليا لا يا بنتي ما ينفع ليك تنحني … انت ما معك احد ؟اييييوة غي هي سولاتني هكداك حسيت بالضيم ديال الدنيا كله طاح عليا دموعي بزز حبستهم و حسيت فعلا بالوحدانية و الغربة بقيت كا نقول في خاطري كاين الله هو اللي معايا … و ضحكت معاها و قلت ليها لا كاين راجلي غادي يجي بعد الخدمة ان شاء الله .. و ملي جا راجلي قلتها لو و بقيت كا نبكي بصمت باش ما يسمعونيش العيالات اللي حدايا و هو كا يسكتني

و للآن فينما نتفكرها كا نبكي لأن كان المفروض يجيو عندي والديا و لكن ما طلعاتش ليهم الفيزا للاسف و حتى لدابا رجعنا دفعنا ليهم ثاني و على الله تصدق … دعواتكم معانا الاخوات

ايوة لهلا يحرم شي وحدة من هاد اللحظة راني دعيت مع منتظرات المنتدى و كل زوجة باش تفرح بالامومة ان شاء الله كيفما فرحت بعد انتظار حتى انا