فقاص ببوريسيما ممممممم هاد المرة بالصور

هاد الفقاص معتمد عندي سنيين هادي و الصراحة ما كنبدلووش تقريبا كيجي غزاال و بنييييين لدرجة كبيرة و اكثرية الى كانت العجينة ديالو خفييفة كيجي مقرمش بزااف و كيخرج الخييييير و البركة ما شاء الله
و كنت فايت حطيتو و لكن بلا صور و عاد اليوم كتاب نحط الصور ديالو و فايت جربوه البنات و عجبهم و نتمنى حتى انتما تجربوه راه ما غتندموش ان شاء الله عليه

المقادير

5 البيضات
حك صغير بوريسيما
4 كيسان عنبة سنيدة
5 كيسان عنبة زيت
2 ساشي ديال فاني
4 خمارات دالحلوى
الدقيق حسب الخليط

الطريقة

نخلط البيض و سنيدة و بوريسيما و الزيت و الفاني و من بعد نزيد الدقيق و الخميرة و نبقا نخلط بشوية حتى نحصل على عجينة خفييفة باش كيجي مقرمش و بنيين
و نعملو قضبان و نحطو فطاوة مدهونة بالزيت و ندهنو بشوية نسكافي و الكاكاو و اصفر بيضة و قطيرات الخل و قطيرات الماء و ندوز عليه بالفورشيطة و ندخلو للفرن انا هنا الطاوة الاولى دخلتها لفرن بارد حتى حطيت اللاطة عاد شعلت و خليتو على نار مهييلة حتى طاب ( انا كنخليه يطيب عادي ما كنطيبوش نصف طياب ) و ملي نخرجو كنغطيه بزيف مبلل و نخليه غير شوية على ما كنكمل الطياب ديال الفقاص و كنبدا نقطع و نستف فاللاطة و نعاود نرجعو للفرن يتحمر من 2 جهات ما تخافوش راه ما كيتهرسش غير خاصو يتقطع بموس يكون ماضي مزيان و بالصحة و الراحة
الصور توضح