طريقة عمل الأرز الأحمر ، وبالصور طبعا

السلام عليكم ورحمة الله وبركاته

إل كل وحدة كيعجبها الروز حبيت نشارككم بهاد الوصفة طنوع من التغيير وكنتمنى تعجبكم

لتحضير هاد الطبق كنحتاجو :
– نص كيلو أرز منقوع من قبل في الما
– 2 كنور دجاج
– كاس معامرش زيت
– بصلة كبيرة مشلظة
– 4 أو 5 معالق كبار مركز الطماطم ،

نسيت ما صورت الزيت

الطريقة :

أول حاجة كناخذو الإناء لي غادي نطيبو فيه ، أنا استعملت الكوكوط باش دغيا يطيب لي الروز ، حينت كان عندي الروز كلاصي هو لي متوفر وهو كياخذ شوية ديال الوقت في الطياب
كنعملو الزيت يسخن من بعد كنضيف البصلة تشحر

ملي كطيح البصلة كنضيفو الروز وكنبقاو نحركو فيه مزيان حتى نحسو بيه تشحر مزيان مع البصلة ، خصنا نبقاو نحركو باش ميلصقش لينا الروز

من بعد كنضيف كنور + مركز الطماطم ، وأيضا كنبقى نحرك باستمرار حتى كيتغير لون الروز وكيولي احمر ، فهاد المرحلة إلى شفنا الروز باقي لونه باهت كنضيف مركظ الطماطم باش يولي لونه احمر كيفما في الصورة

من بعد كنضيف القدر الكافي من الماء ، خاص يكون وجه الروز مغطي كيفما في الصورة ، أنا كندير الماء وكيكون مغطي الروز بحاولي 1.5 سنم
كنغطيه وكنخليه حتى يبدا الماء يغلى وكنسد عليه ونمهل البوطة على الآخر ، خاص النار تكون مهيلة ، باش يطيب على خاطره غير بالبخار
تقريبا كياخذ من 30 دقيقة حتال 40 باش يطيب هذا بالنسبة للروز كلاصي ، وكاين لي أقل على حساب الروز لي غادي تستعملو

هنا قبل ما نسد كنذوق الملح ، إلى كان ناقص كتزيدوه قبل ما تسدو عليه

هادي صورة الروز ملي حليت عليه ،

وهنا بعدما نزلته في الطبق
شوفو كيفاش كتجي كل حبة بوحدها

نتمنى هاد الطريقة تعجبكم وتجربوه

---

‘vdrm ulg hgHv. hgHplv K ,fhgw,v ‘fuh hglolv ugl

انا اللولة انا من عشاق الروز تبارك الله عليك غزال وساهل دابة نجربو موجدالي حقي يعطيك الخير

مرحبا بيك أختي ، والله يبارك فيك
إن شاء الله تجربيه ويعجبك

تبارك الله عليك حفيظة.
غزال وباين تيشهي.
الله يعطيك الصحة.
مع الأسف طلعو ليا سماعات.

الله يبارك فيك أختي
ماشي مشكل ها أنا كنتسالك تقييم هههههههه

تبارك الله عليك حفيظة أرز تيشهي
لك مني أحلى تقييم

الله يبارك فيك بشرى
شكرا على التقييم

الله يعطيك الصحة باين زويييين باليل نجربو
لولدي وراجلي يحماقو على الرووووز

الله يعطيك الصحة غزال

الله يبارك فيك حبوبة
وبصحتهم وراحتهم مسبقا
إن شاء الله يعجبهم