صغار الطارط بالكريما والفواكه المعلبة

كيف حالكم يا غالياتي
اليوم جربت هاد لي طارط اول مرة كندير هاد النوع ديال لي طارط و خرجو لي زوينين

وقلت نصورهم نوريهم للحبيبات ديالي

العجينة:
بكية بسكوي
ماضلين
زبدة ذايبة
حليب مركز ( نستلي )
الطريقة :
نفتتو البسكوي والماضلين ونردوه للطحانة نطحنوه حتى يولي غبرة

نظيفو ليه نستلي وزبدة حتى يجمع ويولي بحال العجينة
(من الاحسن يكون مقدار ديال نستلي اكتر من الزبدة )

ديريه شوي بشوية حتى يتجمع ليك

وشوفي شي بلاستيك تقرسي عليه العجين حيت البسكوي كيما كنعرفة كيتلصق
ديريه من تحت والفوق عاد قرسي
وديريه فعلب البسكوي

ودخليهم الفران يطيبو شوي غير باش يشدو راسهم وصاف
متبعديش على الفران حيت دغيا دغيا راه ماشي غيطيبو حيت البسكوي اصلا طايب

وها هما كيف غيكونو

الكريما :
1 علبة ديال كريم الكريم شانتيي

وتبعي الطريقة اللي مكتوبة فالغلاف
(كطربيها بالطراب الكهربائي مع كاس ديال الحليب حتى تظاعف الحجم ديالها )

ونديروها فعلبة محكمة الاغلاق ونديروها فالتلاجة لمدة 2 ولا 3سوايع

نوجدو دبا الكريم باتسيير

نحتاجو الكريم باتسيير والحليب والسكر
نخليوها على نار هادئة حتى تختار

ناخدو البسكوي ديالنا اللي وجدناه
نستفوه فبلاطو الجهة الفقانية نردوها لتحت و ندهنوها بالحليب فيه شوي ديال فاني

ونقلبوهم ونبداو نعمروهم
اول طبقة تكون بكريم باتسيير..نعمرو بملعقة

ندخلوها التلاجة باش تقصاح وناخدوها نكملو التعمار

الطبقة التانية بالكريم شانتيي

ونعمروها بالفواكه اللي بغيتي
انا درت المعلبات
يمكن ليك ديري الفريز . البنان. الخوخ . كيوي ….. اللي بغيتي

وندهنوهم بالنباج (الطبقة الملمعة) الغالب كيستعملوها على الطارط

(ديري 2معالق ديال النباج مع 1 ملعقة ديال السيرو او الماء وديريها على نار مهيلة حتى يولي سائل ودهني بيه الفواكه من فوق)

وغلفيهم فبلاستيك وديريهم فالتلاجة حتى تكوني غتاكليهم باردين
وبالصحة والراحة مع شي كاس ديال العصير

[gdwl]
نصيحة : من الاحسن الحلو اللي فيه الكريم يتاكل فنفس اليوم