السلام عليكم انا عندي بنت مراهقة ط¹ظٹظٹطھ معاها هي باغيا غير تخرج من الدار حيث دارتها جوج مرات و كترجع في اليوم الموالي درتها صاحبتي و كندير ليها كلشي اللي بغات ماديا و معنويا ولكن والو ضربناها نصحناها داكشي اللي فراسها فيه بغات تمشي قالت لي البارح العيشة ديالكم ماعجبانيش باغا نمشي بكيت عليها و بست ليها ايديها و كون بغات حتى رجليها غانبوسهوم ليها ولكن مع الاسف بحال الا معندها القلب كتشوف غير راسها واللي مسلكها هدرت مع باباها و هضر معاها ماخلا ماقال ماخلا منصح بللي الزنقة مافيها والو و بللي غيجي نهار غتندم على هاد الافعال و هضر على العقوق وسولها اشنو بغات اشمن حل بغات نديروه معاها غير باش تبقى على قبلي انا اللي ضعافيت و مرضت و كلشي العائلة كتعجب ملي كيتشوفني وليت عايشة غير بالدواء ديال الاعصاب بسبابها كنا عايشين بخير غير وصلات سن المراهقة قلبات لينا حياتنا حتى قربات توصلنا للطلاق كدير شي حوايج منقدرش نقولهم و حتى باباها مافخبارو حيث غادي اقتلها ترجيتها البارح بكيت و سخفت في هاد الشهر المعظم واناصايمة طلبتها باش ماتمشيش ماتخلينيش ولكن والو قاليها باباها بللي الاخرجات من الباب ماغاديش ادخلها مازالو بلي غيحرمها من الارث و غيكتب كلشي لولدنا الصغير حيث هو ميسور بزاف و حنا ماقدرناش نفهمو علاش بغات تخلي النعيم وتمشي للشقاء طلبها تجلس على وجهي اللي كنتعدب كلا نهار والله العظيم الا كيشرح ليها وكيعطيها النصائح حتى بكى وهادي اول مرة نشوف الدموع ديالو ولكن مع الاسف وجدات الحقيبة وكتسنى اقرب فرصة باش تمشي حيث انا خدامة و كنسدو عليها فالدار بحكم العطلة اما هي راه العام الجاي غتكون في البكالوريا والله الا خطبوها جوج ديال الرجال بحكم انها جميلة جدا و كدلك حيث انا و باباها ناس معقولين و متدينين الا اقصى درجة و لا نملك في يدنا ان نهديها ولكن كندعيو الله اهديها في كل صلاة لنا على ذكر الزواج كانت ترفض بحجة انها بغات تعيش حياتها بحرية عافاكوم الدموع فعيني صباح مساء قولو لي كيفاش غنقدر نعيش بلا بنتي اللي هي روحي قولو لي كفاش غنقدر ننساها وندير بحال الى ماكيناش كيما كيقول باها انا راه ام وحتى واحد ميقدر احس بمعاناتي الا الامهات انا ط¹ظٹظٹطھ وتقادا الجهد مع هاد البنت اللي قلبها حجرة تجاهنا والله الا قلتليها الا مشيتي غنسخط عليك دنيا و اخرة ولكن والو
whtd hkh uddj
لاحول ولا قوة الا بالله
اختي ماعنديش شي تجربة باش نفيدك و لكن ندعي معاك الله يصبرك و يقويك و الله يهدي ليك بنتك فهاد الشهر الكريم ماعرفتش الخلل فين واش شي واحد كيعمر ليها راسها واش حيت شايفاكم ماكتقدروش تكونو حازمين عارفة راسها مهما دارت غادي تكون ردة الفعل ديالكم هي السماح و غادي ترجع و دير لي بغات بسهووووولة ماعرفتش شنو لي مقوي هاد البنت و شنو لي مخليها متاكدة ان الزنقة هي الحل الانسب اكيييييييييييييد كتشوف قدامها شي نمادج ديال البنات لي كيزينو ليها الحياة ديال الحرية كيفما كيسميوها اولا شي واحد كيخليها تحلم بشي حوايج لي كيبينو ليها الحياة كلها وردية ايلا كانت معاه و هو باغي غير يضحك عليها حاولي تعرفي منها السبب لي كيخليها باغيا تخرج من الدار و انشآالله يهديها و يحنن قلبها و يفتح عقلها و عرفي منها اشنو باغا دير ايلا خرجات للزنقة معامن غادي تعيش و كيفاش و باش غادي تعيش …………….
اختي تصدقي بنية ربي يصلح ليك بنتك وشوفي شي واحد محتاج وعاونيه او فكيه من شي كرب خصوصا انك كتقولي انكم ميسورين الحال وطلب ربيينفس عليك حتى انت كربك والصدقة راها تخرج من الضيق
السلام عليكم …اختي جاوبتك قبيلة ملي كتبتي بالفرنسية ورجعت قلبت على الموضوع لقيتو تحدف …. معرفت واش قريتي الرد ديالي ولا لا ….والمهم شحال فعمر بنتك وشكون صحاباتها ومرافقاهم ضروري مايكون شي حد مطمعها بشي حاجة عليها بغات تخرج
الله يهديها و الله يكون معاكم اختي
عندها 16 عام معندهاش صحابات اللي صاحبات اليوم كتدابز معاها غدا عندها واحد التصرف مع بنادم فشكل
الله يصبرك تصدقي أختي على شي أرملة أوشي حد محتاج وربي إنشاء الله يفك كربتك ويسمعك أخبار سارة يا رب ,الأمومة صعيبة الله يسمح لينا من الوالدين
الله اهدي بنتك وارجعا لطريق الصواب
16 عام ماشي ديال اللعب ….وملي ماعندها صحابات وبغات تخرج عند من غادة بسلامتها …اكيد مخبيا عليك شي حاجة ….دابا جربتو معاها النصاءح التحزار البكا الغوات حتى حاجة ماجابت نتيجة وعلى مافهمت انتي خدامة …. جاتني فكرة ياربي تصدق ليك وان شاء الله تصدق انتي خدامة ياك غتاخدي كونجي شهر وتفرغي ليها …. دابا خاصك تكفضي وتخدمي باش متندميش من بعد وخاصك تكوني قوية البما والغوات ماجاب نتيجة ماكاين لاش تمرضي راسك(تقدري تشوفي شي كوتش غي بالتخبية اعاونك نتي باش تقواي). غتكولي لبنتك بغيتب تخرجي صبري علي غي نهار واحد ونخليك تخرجي نهار واحد والله اعاونك …غتاخدي كونجي وغتجي تكلسي ليها فالظار وتكابليها ولبسي حوايجك ويكون ستيلك قريب ليها وديري شي سبرديلة وتسنايها تخرج الى ماخرجات نتي فكريها وكولي ليها ياك كنتي خارجة وطلبتك غي على نهار يالله خرجي وعاونيها تجمع قشها وحتى نتي جمعي شي صويك صغير وووقفي حداها ملي تخرج خرجي معاها بصاكك والى كالت ليك فين غادة كولها غادة معاك انا ولدتك ومنتخلاش عليك يادفنيني يا ندفنك رجلي على رجلك غتغوت عليك وميعجبهاش الحال متسوقيش ليها بردي وملي تسالي كولها ساليتب يالله طلقينا فين غادين وخرجي معاها بصاح نيت رجليك على رجليها …..غدور حتى تعيا وغي صبري نتي متعصبي متفقسي وكاع دوك الخطط لي كانت دايرة غيضربو ليها فالزيرو حيت منضنش تقدر دير حاجة خايبة قدامك ملي تسالي من التسركيل غتحشم وغتهضري معاها بالخاطر وديها وباتي نتي وياها فشي اوطيل ولغد ليه كولها يالله نخرجو واحد 3 ايام ولا سيمانة كاع غتعيا وغتموني تقربتي منها وتصاحبتو وهادشي بلا غوات بلا والو كولها الى ماهزيت هبالك شكون اهزو ولاكن الفضايح ونخليك تخرجي للزنقة بوحدك تصظقي مكرفسين عليك ولا مغتصبينك ولا شي موصيبة كخلة سلامة ياربي مغتنفع ندامة ديك الساعة وماغيكون عندكم غي تسمحو ليها وتهزوها بكرشها ولا باي حاجة جايباها من الزنقة الله استرها ويستر كاع بناتنا حيت اللحم الى خناز ميهزوه غا ماليه ….. انا جاب لي الله هاد البنت غي مفششة وماحاساش بالامان نتي خدامة وباباها مشغول عليها اكيد خدام وهي معرفات مادير براسها خصوصا كلتي ماليها صحابات لي اسطا معاهم ايوا موني انتي صاحبتها وحاولي تهضري ليها على الزنقة وشنو فيها والمصايب لي كيوقعو فيها غي بالفن وهاد الشهر خصصيه غي ليها خرجو بجوج ديرو سبور بجوج سيرو للجامع بجوج سينما قهاوي محترمة اي حاجة لي تبيني ليها انك معاها ولكن مرة مرة كولي ليها لا على حاجة ماشي تفشش كثر من القياس عاود واصحابها طلباتها مجابة ياعني بحال صاحبتها مرة مصالحين مرة مخاصمين ……الله ادير ليك تاويل د الخير واهم حاجة تصدقي ودعي ربي اهديها ليكم وتافقي نتي وباباها على هادشي وحاولي تدخليه حتى هو اتصاحب معاها ويدوز معاها وقت