خلاصة شعارنا حتى شي حاجة ماضيع تجميع التجارب

-منين تشري الكيس ديال الطحين هاداك الخيط لتتكون مخيطة به زوليه وغسليه مزيان بجافيل والمسحوق ونشفيه وخزنيه
ومنين تبغي اطيبي الدجاج كتفيه بيه او تعملي اللحم ملفوف عمليه مكان خيط المطبخ
في بعض المرات متيكونشي متوفر عندنا خيط المطبخ تيكون بديل ليلو
-ومنين تغسلي الربيع او النعناع في شي باسينة تيكون الماء كثير مترميهشي تقدري تسقي بيه النباتات ديالك وهانتي وفرتي في الماء

-الزيت لتنقليو فيه الدجاج المحمر مرميوهشي
نقليو فيه جميع انواع السمك الازرق /سردين -شطون -اشرن……/ تيجي مداق غزال
-زيت قلي البطاطة ندهنو بيه الاطفال مكان الحفاظة تيمنع الطياب

الفقاص لتفتت ليك طحنيه جيدا وجمعيه بشويش دالزبدة مدوبة وعمليه كقاعدة لتشيزكيك
او جمعيه بالحليب مركز او بالمربى وزيدي عليه بعض الفواكه الجافة وعمليه كويرات وفنديه في الشكلاط ثم في الكوك وعمليه في كويغطلات

المسمن لشاط ليك طروفا وقصاح شويش بخريه في الكسكاس حتى يطرى وعمليلو لاسوس دالرفيسة وسقيه واكلة هنية

لعضومة دالتمر نجمعوهم ونعملوهم في الفريكو
ومنين نبغيو نطيبو الكرعين او اللحم قاصح متيبغيشي يطيب او اللوبية رميو معاهم واحد لعضيم تيفتيهم

شرائح خبز الطوست لشاطت لينا نعملوه بودينك
نزوليليه لحوف ديالو اي الجوانب ونقطعوه على2 على شكل مثلث ونستفوه في مول مستطيل دالكيك ونرشو عليه شويش دالزبيب مرطب في ماء الزهر ونصب عليه خليط من البيض والسكر والحليب مثلا لكل 1/لتر حليب 4بيضات والسكر حسب الدوق ونعملوه يطيب في الفرن في حمام مائي

الزبدة البلدية لرجعات فيها هاداك المداق ديال المرورة منين تطول وخا في الثلاجة مرميوهاشي
نملحوها بالزعتر وزعيترة وازير وورقة الرند وعود سكين اجبير والملح الحية
نصبو على هاد المواد الماء طايب ونخليه حتة يبرد مزيان ونملحوها بيه وها السمن ممتاز عندنا

قشوروعضومة التفاح مترميهمشي
عمليهم في قرعة وصنعي منهم خل التفاح

الفوطة منين تقدام ومتبقايشي تستعمليها مترميهاش عمليها جفاف كتخلي الارضية تتشعل

زيادة على لقالو الاخوات على الخبز
لبقا ليلك البارزيان /الباكيط/ قطعيه دوائر مائلة وعمليلو لعمارة دالبيتزا ورشي عليه الفرماج محكوك ودخليه الفرن غير يدوب الفرماج
واقتراح تاني عمليه في المجمد حتى يقصاح وحكيه وهاهي عندك لاشابلير

قشور البرتقال او الحامض
قبل ماتعصريهم زولي هاديه القشرة الرقيقة ديالهم بموس البطاطا وعمليها تنشف مزيان في الفرن مطفي وطحنيهم وعمليهم في قراعي وخزنيهم وبقاي تستعمليهم كمنسم للحلويات او الكيك او حسب الرغبة ديالك بدل الفاني
واللب عسليه اي عمليه فواكه معسلة

فكرة اخرى لقشور البرتقال والحامض انا تنعنلها دائما كستعمال يومي معمرني ترميهم شحلا ماكانت الكمية
تتغلي هادوه القشور في الماء حتى تيطلقو وهاداك المحلول تتجفي بيه تيخلي الارضية نقية ومعقمة وفي نفس الوقت هاديك الريحة لتيطلق عند الغليان تتعطر البيت

الحليب لخسر ليك زيدي عليه قطرات من الخل او الحامض وقبصة ملح وخليه حتى يبرد وصفيه في شي ثوب رقيق وهاهو عند الجبن البلدي بصحتك
دائما مع الحليب في بعض المرات تنفيضوه في كاسرونة دالعدن وتيشيط اي تيعطي ريحة الشياط في هاد الحالة نخويوه في اناء اخر و نفزكو فوطة نقية ونعصروها من الماء ونغديوه بها ونبقاو نعاودو العملية حتى تتزول الريحة دالشياط

لقدر الله وغفلنا على الاكل فوق النار وحرق لينا ما نزيدوشي عليه الماء ابدا
نزولو برفق داكشي ليفالطنجرة ونعملوه في صحن وللسق في القاع وتحرق نخليوه وناخدو طنجرة اخرى ونعملو فها شويش دالزيت وبصلة مقطعة جوانح رقيقة ونخليوها حتى تنزل عاد نزيدو عليها داكشي لكنا تنطيبو نعملو اللحم ثم الخضرة
ونزيدو عليه شويش ديال العطرية والقوام والماء و تكمل طياب عادي

لبقا ليك الارز او ليباط طايبين
عمليهم كراتان
لكانوطايبين بلاصوص عمليهم في المول وصبي فوقهم البشاميل ورشي الجبن محكوك ودخليهن للفرن يتحمرو تيجي مداق رائع
ولكانو بالحليب زيدي عليهم شويش دالبشاميل وخلطي كلشي ورشي الجبن ودخليهم الفرن او عملي طبقات طبقة معجنات وطبقة مثلا كفتة بالصوص وفي الاخير عملي البيشاميل والجبن ودخليهم تكراتيناو وبالصحة

اتفل او لقامة ديال الشاي نغسلو بها القراعي لتيكون فيهم الزيت تيزول بسهولة ومتتبقاشي فيهم الريحة دالزيت او نعملو ليهم تفل القهوة

لبقات ليك الحرشة فتيها وعمليها رفيسة

لبقات ليك كرواصة بالحق الممتازة المورقة
عمليها ام علي
وليبغات المقادير والطريقة ديالها انا رهن الاشارة

قشور الخيار عمليهم في المكان دالنمل تيهرب منو
الشطة صوص منين تقدام مسحي بيها رؤوس لعوينات الكويزينيار
الطالك منين يطول عندك عمليك في الاحدية اعز ك الله لكانت رجلك تتعرق

قشور البيض مسلوق فتيهم وعمليهم كسماد للغرس

قشور البنان /الموز/
مسحي بيهم وجهك
كدلك مسحي بيهم الحقائب و الاحدية الجلدية

الرماد دالفحم
حكي بيه الاواني النحاسية تيرجعهم تيشعلو
وعمليه كدلك في لمحبق دالغرس كسماد

عندك خيار كتير و خايفة ليخسر ليك
تجريبتي المتواضعة لتنعمل
اي خضرة متتصبرشي بحال الكورجيط لخيار الربيع ……..
تتعمليهم في توب مقطن دالمطبخ وتويهم فيه وتعمليهم في الثلاجة تيصبرو مدة طويلة
ونتمنى من الاخوات لعندها شي فكر ماتبخلشي علينا بها الكل يستفيد

المقلة دالبغرير لمبقاتشي تطلع البغرير او دوزتي فيها ليدام مثلا طيبتي فيها ليكريب
عملي فيها الحليب ومنين يغلى زيدي عيه شويش دالنخالة وحركي مزيان حتى تشرب الحليب بالكامل وتنشف
تترجع بحال عاد شريتيها
هادي تجربة شخصية

عندك كيوي بالزايد قشريه وقطعيه ورشي عليه شويش دالسكر وعمليه في اكياس صحية وعمليه في المجمد

لعندك اي حليب مرطب مبقيتيشي تتستعمليه او نتهت الصلاحية ديالو
مسحي بيه اللوح دالبلاكار او اي خشب عندك

الطجين لتشقق
عمري مكان الشق باصفر البيض تيلتحم الشق

فرشات الاسنان لقدامت
غسلس بيها المجوهات
نضفي بيها الكلافيي
نضفي بيها اليد دالثلاجة وكدالك الجلدة ديالها
نضفي بيها حافات الروبيني د لافابو
وجميع الاماكن ليمتتوصلسي ليلهم الشيتة لكبيرة

بقايا الكيك
في كؤوس لتنقدمو فيهم المثلجات عملي قاعدة من التحت ديال الكيك وسقيها بشيش دالسيرو ثم طبقة من الفواهك مقطعة ثم طبقة كريمة وهكدا حتى النهاية وزيني بالكريم فريش ورشي اللوز او الفيرميسال وقدميه بارد
او عملي طبقة كولي اي فاكهة ثم طبقة الكريمة ثم الكيك وهكدا حتى النهاية وزيني دائما بالكريم فريش ويتقدم بارد

لتبقى ليك الدجاج او اللحم دالمناسبات
فتيهم وعملي بيهم
اما بسطيلات فردييين او حتى بسطيلة كبيرة اما مالحة
شحري بصلة مع التوابل والربيع وزيدي عليها الفطر والزيتون المصير و الشعرية الصينية والفرماج وخلطي كلي وعمري بيه
او حلوة
زيدي اللوز مقلي وعملي دغميرة دالبصلة والبيض وعمري كيف العادة
او عمليهم كراتان
او بريوات
او رغيفات في الفرن……………………………………… .

البخاخ ديال الصابون الخاص بالزجاج والمرايات منين يتسال حتافضي بيه
-عملي فيه الماء والشبة مطحونة ورشي بيه الركاني تيمنع تكون العنكبوت /رتيلة/
-وعملي فيه جافيل ورشي بيه الحيوط والسقف ليفيهن لغمال ومتحكي ماوالو منين غادي ينشف مغاديشي يبقى الاثر دالغمولة نهائيا
-والبخاخ الصحي يعني متكونشي فيه مواد كيماوية
-عملي فيه الحليب ورشي بيه المعجنات لمتيدهنوشي بالبيض
-او عملي فيه الزيت للرش الطاوة اواي حاجة تتدهن بالزيت

الخضرة للوات
عمليها في ماء مثلج دقائق قليلة وراها غادي تجمع راسها

واحد النصيحة منين سمعتها من اللقاء المتوح وانا تنعمل بها
الجلدة دالكوكوط منين تشريها جديدة دهنيها بالزبدة عاد ركبيها
منيني تبغي تحلي الكوكوط متعمليهاشي تحت الماء ابدا ولخفت من البخار ينتشر في المطبخ
زولي الصفارة وغطي مكانها بثوب وخليها حتى يخرج المخار عاد فتحي
بهاد الطريقتين غادي تنساي تشري الجلدة
انا كنت من قبل واكلاني كل مرة خاصني وحدة حتى رجعت نشري بالصطوك
ولكن الحمد لله ديا معلتشي حتى على متى ركبتها

-صوص فينيكريت
لكرا ليها الخل وجاتنا زايدة في الحموضة
نضيفو ليها شويش دالسكر على حساب الكمية لعامليين تينقص من حدة الحموضة
-العصير لعملناه حلو زايد نضيفو لو عصير الحامض تينقص من الحلاوة دالسكر

ليبات لقدامو نعملو فيهم النباتات والازهارالعطرية /خزامى-قرنفل-ورد -نقطة زيت عطري في قطعة قطن /
وعمليهم في بلاكار الملابس وفي ركاني الصالون وفي اي ركن في البيت

-والتقاشر دالقطن مسحي بيهم الغبرة

لستعملتي بياض البيض وبقى ليك الاصفر عمليه في كاس او زلافة وغطيه بالماء وغطيه ببابييي فيلم وخليه في الثلاجة تيبقى صالح لمدة 3ايام

اكياس الشاي واكياس المانصنية /البابونج/ ليتنعطيو للاطفال من المغص
منين نستعملوهم نعملوهم كمادات للعينين تيزولو النفاخ وترتاح العين

صابلي منين تبقى لينا نطحنوها ونعملوها قاعدة ليتشيزكيك
او نزيدو عليها من بعد مانطحنوها الكوك و الفواكه الجافة /لوز -زبيب- كركاع -كاوكاو ……/
ونجمعو الكل بالحليب المركز ونكورو ونعملوهم في الشكلاط مدوب ثم نفندو في الكوك او الفيرميسيلوتقدميهم في كواغك الحلوة
-ويمكن تمعي الكل بالشكلاط وتحربليهم بحال الفقاص دهنيهم بالشكلاط وتخليهم حتى يجمد عليهم الشكلاط وتقطعيم مربعات او على شكل فقاص وتقدميهم في الكواغط دالحلوة

نفس الشيء بالنسبة لحلويات اللوز بحال /الملوزة وما شابه……./
نضيفو عليهم من بعد الطحن الكوك والفواكه ليعندنا مهرمشة ونجمعو بالشكلاط ابيض او الحليب المركز ليمتيحبشي الحلاو بزايد يعمل الحليب مركز مسوس وتكور وتفند في اللوز فيلي وتقدم في كواغط
او حسب دوق كل وحدة المغربيات فنانات تبارك الله

الى تحرقات ليك الماكلا في شي طنجرة اولا طجين اولا كوكوط كتاخدي الملح والماء
وتخليه يغلى 15 دقيقة وتحيديه وتغسليه عادي.
او الماء والخل ولما يبدى يغلي تحكي بملعقة خشب وهو تيغلي تتزول الحراق بسهولة

قلنا من قبل قشور البيض نعملوهم كسماد للنباتات المنزلية
كدلك الماء ليتسلق فيه نعملوه للنباتات بشرط ميكونشي فيه الملح او الحامض
لان الملح تتيبس النباتات وتتقتلهم
هادي فكرة اخرى لعندك شي نبات مزعج وبغيتي تخلصي منو رشي عليه الملح

عملي في كيس المكنسة الكهربائية بعض القطرات من الريحة لمتستعمليهاشي اوشي ريحة عندك
منين تتخدميها تتخلي ريحة مزيونة في البيت
دائما مع الريحة انا تنعمل غلاقة في الماء الكافي وتنجفف بيه البيت

طريقة رائعة لتنظيف زجاج النوافد بدون ماء شفتها وجربتها في الحين النتيجة مبهرة وحبيت نعطيها ليكم
المسالة بسيطة جدا عندك تقاشر/ الجوارب/ دالنيلو مسحي بيهم ناشفين الزجاج تيرجع تيشعل
دخلي يدك في التقشيرة ومسحي بيها ناشفة وشوفي النتيجة بنفسك

لحفظ الخضروات الورقية في الثلاجة طازجة لأطول فترة ممكنة قبل غسلها ضعيها في أكياس ورقية حتي لا تتعرض لتيار هوائي بصفة مستمرة ولا داعي لوضعها في أكياس من البلاستيك إلا إذا قمت ِ بغسلها وتجفيفها ثم لفها بفوطة نظيفة ثم تضعين الفوطة داخل الكيس البلاستيكي فهذه الطريقة تحفظها لكِ ليومين أو أكثر جاهزة للأكل الفوري منها.

تزال رائحة الطبخ عن اليدين بفركهما بالخل .
تزال رائحة البصل عن اليدين بفركهما بورق البقدونس .
تزال رائحةالثوم عن اليدين بفركهما بتفل القهوة .
تزال رائحةالسمك عن اليدين بفركهما بالليمون .

الطارط بالفواكه باش تقطعيها ويبقى شكلها جميل
عملي السكين في ماء مغلي ومسحيه وقطعي بيه
ونفس العملية في كل مرة

كيفاش تسلقي البيض المهرس
يمكنكِ تغليفه في ورق الألمنيوم ثم إسقاطه في الماء المغلي
.أما إذا كان البيض سليم من الشروخ فيوضع في ماء فاتر عند سلقه حتى لا يتكسر .

لنكاصات دالضو والبوانيي دالابواب
حكيهم بالجيكس ناشف بال ما بلا والو ومسحيهم تيرجعو تيشعلو

الدجاج لفوت في الطياب وتحل
زولي لغطا دالطنجرة وخليه حتى يبرد تماما راه غادي يشبر راسو
عاد هزيه برفق وعمليه في مول دالفرن وزيريه مع بعضياتو لكان بزاف
اما لكان غبر واحد عمليه على جنبو ودخليه للفرن يتحمر من بعد ما تكوني دهنتيه بالزبدة

الكرعة الحمرا للقيتيها باسلة
تسلق مع السكر بضع دقائق وتستعمل

زيت الزيتون لقدامت
زيدي فيها بضع حبات زيتون اخضر وتترك في مكان مظلم 4ايام تترجع بحال الجديدة

دجاج باش متزولشي ليه الجلدة دالصدر
منين تكوني تتنضفيه فصلي الجلدة على الصدر متبقاشي لاسقة فيه بحيث دخلي يدك مابين الجلدة واللحم بلا ماتقطعيها
وشملي مزيان ما بينهم وخليه حلى ضهرو ليلة كاملة حى يشرب شرمولة مزيان
وفي الطياب متغطيشي الطنجرة كاملة غير النصف فقط
وفي الاول نزليه على جنابو وفي ربع ساعة الاخيرة عاد على صدرو
طريقتي الخاصة متتزولش لي الجلدة

الكرعة السلاوية لجاتك باسلة
رقديها في الماء والملح قبل الطهي

الكرعة الحمرا لكانت عنك بزايد
عمليها
عصير
مربى
الفيزر تيفسدها متعليهاشي فيه ابدا

الدلاح لجاك باسل عمليه عصير

لعملتي المربى وجاك حلو بزاف زيدي فيه عصير الحامض

لعملتي العسل وجاك قاسح
عمليه فوق نار هادئة وزيدي عليه قليل ماء مغلي وخليه غير يتجانس وطفي عليه
الماء على حساب الكمية ليعاملة واش قليلة اوكثيرة عينك ميزانك

لبقا ليك في اخر الشهر بقايا من اللحم والدجاج والصوصيط والكفتة كل حاجة منها غير شوية
قطعي الكل بالتساوي وشحريهم كل واحد لوحده مع قليل بصل وتوابل ومن بعد خلطيهم كاملين مع بعضهم
وعملي قاعدة بالعجين المكسر مالح وصبي فيها الخليط كامل
وطربي البيض الكافي مع قليل كريم فريش دالطبخ وصبيه فوق الكل ودخليه الفرن يطيب
وهانتي عندك كيش بدوق مميز

لبقى ليك الارز مسلوق طحنيه مع قليل جبن وكوريه وعملي فيه ثقب وعمريه بالجبن محكوك وعاود كوريه من جديد بحال الكبة
وفنديه في البيض ثم في الشابلير وقليه في الزيت غزير وبالصحة هاد الفكرة خديتها من الشيف يسري

منين تعملي البرقوق مشماش سفرجل ….. معسلين
زيدي في الاخير م ك مربى مشمش وم ك زبدة تيجي منضر ومداق رائعين

لبقى ليك البرقوق او المشماش او الكرموس معسلين دالفرح
لكان مزيودة فيهم المرقة داللحم في اطياب
عمليهم في بواطات وعمليهم في المجمد ووقت ليحتجتيهم خرجيهم وسخنيهم عادي
ولكنو معسلين غير بالماء والسكر التعسيلة العادية
عمليهم مربى معسيهم اوطحنيهم وزيدي ليهم السكر لحتاجو وخليهم فوق نا مهيلة حتى يعقادو وزيدي عصير قليل حامض وبالصحة

منين تتعملي البسطيلة تيبقى هادوك الجناب دالورقة او شي ورقة مقطعة تتاخديها
تندوزيها في المكينة دالرزيزة وترشوها بالزبدة مدوبة وتنعملوها اعشاش
وتنزينو بها البسطيلة
لكانت حلوة تتعمري الاعشاش بالمكسرات
ولكانت مالحة تتعمريهم باي حاجة مالحة مقطعة رقيقة بحال كورنيشو وزيتون وفطر او طيبيهم خاويين وعاد عمريهم ببيض السمان مسلوق او غير البيض العادي مقطع على 8
وزيني بيهم البسطيلة من الفوق

منين تشري النعنان العبدي او لكناوي وتنقيه حتافضي بجدورة او السيقان ديالو وغرسيهم في محبق وعمليه في البالكو او شي مكان مهوي
وبقاي تسقيه بالماء لتغسلو به الربيع او الخص او النعنان او …..
ومن بعد مدة قصيرة ها النعناع عندك طبيعي والريحة ومنضر روعة وغير عريش منو يكفي

باش تتهناي من سراق الزيت الصغير ديال المطبخ عملت لو واحد 3 الحوايج ومع عرفتشي اشنوليجاب الله عليه السبب
المهم عملت الكافور وبايكون غبرة واحد الصاشية تتباع ب5دراهم تتخلط مع دانون صغير
تتعمليهم في الركاني واي بلاصة تيتواجد فيها من بعد غادي تفاجئي بالجيوش دصراق الزيت لغادي تلقاي ميتين

باش تقشري الزنجبيل الطري بلا ما ضيعيه قشريه بالملعقة الصغيرة راه تتزول غير القشرة الرقيقة

لتخنقو ليك لعيون دالفورنو عملي فيهم بضع نقاط من الخل

الميكة ديال السباكيتي مترميهاشي
منين تخويها حتافضي بها
طيبي فيها الكاشير لمكانسي عندك اللاطة ديالو

عند ادجينز متيتستعملشي ها شنو تعملي بيه :حامل نباتات في المطبخ

تستطيعن أن تستغلي بنطلونك الجينز القديم في تزين جدار المطبخ أو البلكون ، كحامل للنباتات،

الجرائد معمر ترميهم
مسحي بيهم النوافد الزجاجية والمرايات
من بعد مترشي عليهم الصابون الخاص بيهم مسحيهم بثوب مسحة خفيفة ثم مسحي بالجريدة تيرجعو تيشعلو

ها اشنو تعملي بالجرائد الاشهارية
عمليها كورني
ملاحضة
تيقولو اليمنيوم غير صحي يمكن تعوضيه بورق سيرفيريزي

شوفو المراة المغربية اشنو عملات بالبلاستيكة

هاد الفكرة عجباتني ونقلتها ليكم
بالنسبة للمبتدئات غادي تسهل عليهم المهمة

للقتي البطيخ باسل /الشمام / مترميهشي
عمليه عصير او مربى
او قشريه وقطعيه مربعات وعمليه في المجمد ووقت لبغتي تعملي العصير تلقايه موجود

لنبت ليك شي راس دالثوم
عمليه في كاس طويل وعملي عليه الماء غير يغطي الجزئ السفلي ديالو وخليه ومرة مرة زيديه الماء لقل
وغادي تحصلي على الثوم القصبي

الرولو الورق منين يسالي
مزال عندو مهام اخرى
انظر الصور

غلفيه بورق الهدايا او ثوب مزركش

الكيسان لمبقيتشي تستعمليهم او بقاوشي كاملين
عمليهم لحمل الشموع

علبة كلينيكس منين تسالي
عمليها لحمل الاكياس البلاستيكية

هاد الفكرة عجباتني بزاف
باش يكونو الملابس الداخلية اكثر تنسيق وفي مساحة اقل

التقاشر دالصوف
عملي فيهم الاحدية اعزك الله للحفاض عليها

غلاف النضاضر ها اشنو تعملي فيه

بلاستيكات ديال مكعبات الثلج لمبقيتيشي تستعمليهم
ها اشنو تعملي فيهم

باش تحافضي على نضافة السيارة
عملي كيس للنفايات في خلف الكرسي الامامي

منقول

افكار بعلب الشومبوان

باش تحافضي على النتاف ومقص الاظافروغيرهم من الضياع
عملي قطعة مغناطيس /الهند/ في الصيدلية ديالك ولسقيهم فيها

شوفو اشنو تعملو في قشرة البيض
نعمروها بالشمع مدوب

ونعملو وسطها
فتيلة ونشدوها كيف ما في الصورة

ومنين تجمد نقشرو البيضة

وها حنا حصلنا على شمعة بشكل بيضة

منقول

غلايق المونادا
عمليهم اكسيسوار للمرايا

فكرة لعلبة النسكافيه

الأدوات :

1-علب نسكافي كبيرة أو صغيرة

2-خيط خاص من الخيش +قطعة من الخيشة العادية

-غراء المسدس+ورق مقوى صغير

الطريقة سهلة جداً

1-قومي بغسل علب النسكافي جيداً وقومي بتنقيعها في ماء ساخن لمدة 5 دقائق لكي تستطيعي نزع الورقة الملصقة

عليها ثم نشفيها جيداً.

2-أحضري الخيط والغراء وقومي بلصق الخيط من طرفه أسفل العلبة الزجاجية ولفي الخيط على العلبة بعد وضع الغراء في كل مرة ولا تضعي الغراء كله على العلبة لأنه سريع ويجف بسرعة ولا تستطيعي لف الخيط بطريقة منظمة لذلك لا
تستعجلي وقومي بالعملية خطوة بخطوة لا تلفي الخيط كله على الزجاجة بل أجعلي جزء منها مكشوف .

3- قومي بلصق قطعة من الخيشة بعد قصها بشكل دائرة على الغطاء من أعلى وبعدها خذى الخيط وألصقيه بدقة على
الجوانب لكي تخفي حواشي الخيشة ولفيها جيداً على الغطاء بالكامل .

4-بعد ذلك قومي بقص قطعة صغيرة من الورق المقوى كما ترغبين بها أما بشكل مربع أو سداسي أو دائرة وألصقيها على

العلبة ومن ثم تستطيعين أن تحفضي فيها اي شئ ترغبين فيه وتكتبين علي الورقة .