السلام عليكم و رحمة الله و بركاته نتمنى جميع الاخوات يكونوا بيخير اللي مزوجة الله يكمل ليها بالخير و يجعلها هيا و زوجها صالحين و اللي ما زال ما مزوجة الله يسترها و يرزقها الزوج الصالح.
الحمد لله رزقني الله بزوج احسن من اللي تمنيت و درنا العقد و اتافقنا ان شاء الرحمن نديرو العرس بعد رمضان العقبة للعازبات.
هذي اول مشاركة ليا في هاد الموقع الاجمل من رائع كنت متابعاكم من بعيد و اليوم تشجعت نكتب و نستشيركم.
زوجي على قد الحال و عطاني غير 3 الاف درهم باش نشري الحويج اللي غيجيبلي في الدفوع ومازال ماشريت والو وماعارفاش اش غنشري حيت الفلوس قليلة جاتني ما تشريلي حتى 2 جلالب و 2 قفاطن نصحوني الله يجايزيكم بيخيرو حاجة تانية عمرني ما درت الماكياج و ما نعرفش حتى منين نبداه وعمرني ما درت بوماضات و لا شي وصفات لا لوجهي و لا لجسمي حتى شعري كيطيح ليا بزاف و زوجي الله يخليه ليا قالي عاجباني كيفما انتي ما تديري والوا ولكن راكم عارفين المراة هيا اللي خاصها تكون لاله و مولاتي و تباني اميرة قدام راجلها. الله يجازيكم بيخير ديروني ختكم و فهموني و رشدوني حيت اختكم ما كتفهم والو.
عندي اختي مزوجة عطاتني 2 جلابات ديال عرسها كانت لبساتهم غير في الشهر ديال عرسها باقين جداد و اختي تانية شراتلي لي شوميز و لي برفان و لي ندوش و لي بواط ديال الماكياج ولي كريم يعني كل وحده كتدير اللي في جهدها حيت انا لصغيرة في الدار.
طولت عليكم بزاف سمحولي نسيت ماقلتش ليكم انا غنسكن بوحدي في داري وراها مفرشه باقي غير بيت النعاس راجلي كيوجد فيه و الكوزينه فيها الماعن من بعد ونشري الى خاصها شي حاجة بغيتكم تنصحوني اشنو نشري و ومنين نقدر نشري انا من الدار البيضاء و الفلوس على قد الحال وزوجي قالي قضي بالموجود ومني ربي يسر علينا نشري ليك اللي بغيتي. قصدتكم و المقصود ربي كيفما تنوروني بالحلول سواء صور و لا كتابة بغيت ربي ينور طريقكم للجنة
pth, udkdh fjrghf hgwtphj > lh jfog,a ugn uv,sj;l hg[]d]i fhglshu]i uvsK ,[iK auvK gfsK ‘gf
كانضن اختي ملي عطاطك أختك 2 جلابات حاولي تزيدي وحدة اخرى تكون مزيانة و ديري ف ليشاط ليك من الفلوس شي قفطان و تكشيطة و ان شاء الله يعاونوك واليديك ف لي باقي
الله يسر ليك اختي و يرزق ليكوم ذرية صالحة
ان شاء الله ربي غادي يبارك ليك فداكشي لي عطاك راجلك ديال الفلوس غير انتي حاولي تشري الضروريات و بس
2 بيجامات او 3 و ديري تكشيطة و قفطان و جلابة باراكااا اما الا كان قياسك قد اختك باراكا غير هادوك لي عطاتك و صاك و صبيبيط و صندالة ديال الحضور و بينوار ديال الحمام و شي لعيبات باش تدوخي الرويجل الديالك ههههههه الاسلحة
واي استفسار انا موجودة راه حتى انا عندي العرس مورا رمضان ان شاء الله
انتي من اي مدينة اختي انا من الرباط
اختي كازا فيييها منين تشري داكشي سيري غير درب السلطان او القيصارية ديال الحي المحمدي تلقاي العجب انا يالله كنت هاد العطلة في كازا فيها داكشي غزااااال
المشاركة الأصلية كتبت بواسطة أمي نبض قلبي 
يرحب بيك الخير اختي شكرا ليك