تجمع لصاحبات الشعر الناشف والمتقصف

شعري مسكين را طالب الشرع

يا لاللا نبداليك ماخليت ما درت ليه خا نقوليك هير علياش عقلت

فالصرااحة انا الحاجة الي درتها ليه الحمد لله تاتعطي نتيجة سريعة

كنت تانخلط عرام ديال الزيوت هالحية الخروع هاللوز ها املا موهيم الي شريتو تانخلطو ونديرو و نشققو بيهم وكنت دايرالو الترطيبة بعدا ايوا الترطيبة مع دوك الزيوت كان الشعر غزااال :unconscious: تحلفي عليه اما كان حرش ،
ولكن الخطأ الي درت هو انني كنت تاندير الزيوت و تانبيت راسي فميكة و الدرة وانا تانشوف الشعر و لا بطيح ليا بزاف :miserable: الصراحة انا كنت قريت انه الا خليتي الميكة على الشعر كتر من 3 ديال السعات تيببدا يطيح لانه تيتحلو المسامات بزاف و الزغبة تاطيح ولكين ماتيقتش حتى جربتها ههه حنا المغاربة راسنا قاصح

ايوا عاد الي ما بقيتش تانبيتو فالميكة تاندير هير الدرة صافي و عاد وقف مابقش يطيح

وكنت انديلو نيسكافي وحدة ولا جوج مع شي 3 ديال المعالق كبار ديال القهوة العادية ( سيزيت ماما بعدة فالقهيوة ) ايوا وكنت ندير معاها شي 2 ديال الصفر ديال البيض و لا 3 لاحقاش انا شعري جاف معا معلقة صغيرة ديال الاوكسيجين رقم 9 هير الما ماشي الغبرا و كنت ندير معاهم الزيت البلدية مطحونة بلا ملحة باش مايتهرسش الشعر وكنت تنكتر الزيت مزيااااان باش داك الاوكسجين مايأترش فيه ، تانخليهم ديك السعتاين وتانغسل شعري و كنت نديرها و نعاودها ولا فشعري واحد اللون ماغون غزااااااال و بالعلم انا راه شعري كحل بزااااف واخا هكاك تفتح وماحدكي تاتعاوديها و هو تايتفتح

ايوا وكنت نديلو شي 3 ديال المرات ف السيمانة معلقة ديال العسل مع معلقة و لا 2 كبار ديال زيت اللوز و زييت الخرواع حتى هيا و حتى المايونيز الى كان عقلي صحيح المايونيز الي غاندير لشعري كنت نصايبو نتاع الدار ما كنتش ندير فيه الملحة و الابزار

ايوا مانقوليكومش هاد الوصفة الاخيرة غزااااااااالة تاترد الشعر تايبري بحال هادوك الي تايشهرو شمبوان

ايوا دازت ديك الايام و فرحت بشعري زويون شوية و هاهوا ولا يتهرس ليا مسكين هداكشي كاااع الي كنت دايرا ليه الترطية مشا لحقاش انا ديجا مقيوصالي الجلدة و الى درت الترطيبة من بعد تايطيح كولللو تايتهرس

ايوا ولا شعري مسيكين صغيييور و وهو راه صغيور اصلا
ايوا عاد وليت تاني نطول فيه من جدا و جديد
هاد الشعر غيحمقني

وليت نديلو الجرجير الاخضر مع نص بصلة و البنان و دانون هادشي كولو تانديرو فمولينيكس و تانطحنو و نمشي لداك الدوش و نجلس قدام المرايا طلي يا متطلي و تانديليه ميكة و ندير فوقو الفوطة باش اعرك مزياان و نخليه ساعة ونص ولا ساعتاين و نغسلو قاليك هاد الوصفة فاش طليها وتسالي غسلي ودنيك الى تطلاو و جبهتك لحقاش تاتنبت الزغب فاي مكان و بصح كنت نديرها كل نهار و بدا يكبرلي على سيمانا شفت هداك القدامي ولا يطوال وكنت نغسلو بشامبوان و الديميلور ديال فور ايفر لحقاش قاليك شامبوان العادي فيه دوك المواد الكميائية تايزيدو يقللو لينا الغلايا الدهنية فالشعر و منحيت انا تانعسلو كلا نهار بزاف خصني شمبوان طبيعي والشركة ديال فور ايفر تادير داكشي كلو طبيعي و لكن غالية شوية ولكن راه فيه بزاف و مركز بزااف وهادشي كولو + من الصبار يعني راه مغالي والو الا جينا نضربو الحسبة

المهيم هاد شمبوان ديالهم 200 درهم و الديميلور بحالو فالثمن ودابا راه خرجو واح المضل جديد ديال شمبوان غزاااااااال سميتو فوليم انا تاندير البرتقالي لاحقاش فيه 2 لوان اليموني و الشيبي ، الليموني هو منتاع الشعر الجاف و المنيل بحال ديالي و الشيبي نتاع الشعر العادي و انا دابا نقادالي شامبوان وليت ندير هير اليميلور ديالهم مع شامبوان العادي وتايعطيني نتيجة زوييينة واخا هاكاك

ايوا المهيم عيت من داك الطليان ولا شغادي نقوليكم ماشي عيت قوصو عليا بقاو عليا كولا نهار طاليا لداك الشعر ها ماتاتعكزيش ها هادي حتى مابقيت نحمل ندير حتى حاجة هادا هو الي تايقولو ليه الحسدة على قروعيت الراس ، وا ماشي القُهرة هادي ؟!!!

ايوا مشات مووودة ما درت شيحاجة لراسي شي عام ولا كتر

ايوا من بعد وانا نزعم درت هاديك التومة مدقوقة و خليتها فزيت عافية 10 ايام ولات عندي زيت التومة وتانشقق بيها شعري و ايوا ولا زوييون وكتر و مابقاش ناشق شوية وولا يطوال و هاهوما عاوتاني خوتنا صحاب الحسنات بداو فالنكير

ايوا مابقيت نحمل ندير تاني حتى حاجة شي عام تاني ولا كتر ايوا هاد الايام راني وليت نديلو الزرع منبت وغليت الزعتر فجوج كيسان ديال الماا وتاتخليه تايغلى تايولي ليك ربع كاس وتاطحنيه مع داك الرشيم ديال القمح وتاتصفيه فليباموس ولا الزيف دديال حياتي والديريه فالرشاشة وترشي بيه شعرك كولا نهار هادي شي سيمانا تقريبا باش يديتو ووليت الاحظ انه بدا يخلف من القدام ويعمر مع انا عندي خاوي من القدام شوية وقاليك هاد الزعتر مع الرشيم ماتايخليهش يطيح ولا يتقصف هاد الوصفة راه قالها جمال السقلي و قريت البارح فالمنتدى هنا انه الترمس مطبوغ تايطول السعر (الفليلة المرة) الما ديالو قاليك عاد ناوية انطبخو ونزيدو معاه

ايوا يالبنات مافيا مايكتب وكتبت ليكم هاد الجريدة ساعة وانا نكتب فيها
لحقاش حتى انا تانستافد من هاد المنتدى بزاف و قلت حتى انا ستافدو مني واحد الشوية ولو هير بكلمة وحدة والله ما نعز فيكم حتى معلومة ولو كانت صغيرة

ايوا دعيو معايا البنات بالجنة من غير حساب ولا سابق عذاب و يسهل الله زواجي و يطولي شعري ويرطبو هههه هاد الشعر غايحمقني

.

.

.

.

ضحكتيني الله يفتح ليك بيبان الخير فين ما كانو دنيا واخرة

اولا الوصفات الطبيعية وخا كثرتي على شعرك ماتخافي والو

بالنسبة لشعرك الى معقدك احسن من الصلع دائما نحمدو الله على اي حال عليه حنا الرضى ثم الرضى

لانه حتى واحد ماكامل فينا الي ماجاتو فالشعر جاتو فعينيه بحالي عندي قصر النظر ويستحيل انني نستغنى على النظاظر حتى نبغي نعس واول مانفيق اول

حاجة هما النظاظر

ولكن الحمد لله وتنقول اللهم قصر النظر ولا العمى والحمد لله الرضى ثم الرضى