يتبث الموضوع
بسمة الأمل
20/04/2019
أخواتي و حبيباتي في الله
هذا صابلي ساهل بزاف و كيخرج أشكال كثيرة وخا أنا درت منو غير زوج شكال لكن الماكينة فيها بزاف الطوابع و أنت ممكن تتفنني فيها كيف بغيتي .اللي ما عندهاش هاد النوع من الماكينات ممكن تديرها بالبوق أو ترشمها بأي طابع الحلوى متوفر عندها المهم كتجي حلوى لذيذة بزاااف و في الأخير يبقى الحكم ليكم اللي جربتها ترد علي الخبار وتدعي ليا عن ظهر الغيب و ربي إن شاء الله يعطيها مثل دعواتها و أحسن…
بسم الله توكلنا على الله
صابلي الماكينة
المقادير
نصف كيلو الزبدة العبار لينة
رابعة سنيدة
4 بيضات
نصف رابعة الكوك
2 خميرة الحلوة
الدقيق حسب الخليط
للتزيين:
بودرة الشكلاط
العقيق الفضي
الفواكه المعسلة
الطريقة
نخدم الزبدة مع سنيدة مزيان حتى تولي بحال الكريمة.نضيف البيض بوحدة بوحدة و انا
كنخلط.و نزيد الكوك و الخميرة و قبصة الملح و الدقيق حتى تجمع
العجينة.نخليها مرخوفة .ناخد جزء من العجينة و نضيف عليه الشكلاط بودرة .
ندير العجينة في الماكينة
هذا شكلها صورتها ليكم
نصايب منها هاد الشكل
و نزينه بالفواكه المعسلة
و نصايب هاد الوريدات
ملي نكمل ,ناخد العجينة اللي ضفنا ليها الشكلاط و نديرها في الجيب الحلواني و يكون البوق صغير و نزوق بيها الوردات .
نحط من الفوق العقيق الفضي
و ندخلها للفرن.و هذا شكلها النهائي
اللهم أدمها نعمة و بارك لنا فيها و احفظها من الزوال
إلى لقاء قريب مع وصفات جديدة
لكن مني أرق تحية معطرة بأريج الزهور و الرياحين
Read more: https://www.anaqamaghribia.com/vb/sho…#ixzz2R06CtMBa