برنامج اللقاء المفتوح على اثير اذاعة الرباط

هذه نصائح بثتها أمواج الاذاعة الوطنية بالرباط على لسان سيدة من القصر الكبير استضافها برنامج اللقاء المفتوح في حصة النصائح المنزلية، ارتأيت أن انقلها هنا لنستفيد جميعا منها :

– اذا كان عندكوم لافابو مخنوق خودو ملعقة كبيرة بيكربونات الصوديوم ، نصف كاس د الخل ، وكاس كبير ماء طايب ، نخويواه ف لافابو ونخليواه ليلة كاملة ف الصباح نلقاواه تسرح بوحدو .

– باش يولي الزليج د الحايط وديال الارض كيشعل والريحة ديالو مزيونة كنجيبو ريحة من نوع رخيص نزيدوها مع ماء سخون ونمسحو بيه الزليج ديانا كيولي كيلمع وريحة ديالو غزالة .

– البسبوسة ، مين نبغيو نسقيوها من الاحسن نستعملو حليب مركز محلى عليها وهي سخونة ، ثم نرجعوها للفران بعدما طفينا عليه و هو سخون باش تتشرب البسبوسة الحليب مزيان .

– مي نبغيو نصبنو المانطات و البطانيات ، بدل مسحوق التصبين نستعملو بان دو دوش (صابون سائل ديال الجسم ) نصبنو بيه ، كيخلي الغطا ناعم وريحتو زكية وعطرة .

– بالنسبة للكيكة ديال الشكلاط ، من الاحسن نرشو القالب ديال الكيكة قبل ما نكبو فيه الخليط وبعدما دهناه بالزبدة او الزيت بغبرة الشكلاط بدل الدقيق اللي كيبقى على الوجه ديال الكيك ابيض . نفس الشيء كنعملوه مع الحلويات د الشكلاط اللي كنعدلو .

– باش نتخلصو من الروائح الكريهة اللي كتكون ف التلاجة ، ناخدو زليفة فيها عصير الحامض فيه قطعة قطن ونخليوه اسبوع في الثلاجة فهو يمتص كل الروائح غير المرغوب فيها داخل التلاجة . كل اسبوع نكررو العملية ونغيرو عصير الحامض و القطن .

– بالنسبة للفريكو كنرميو فيها 3 الى 4 بكيات ديال خميرة الحلوى ، باش نقضيو على روائح المواد الغذائية اللي كنحطو في الثلاجة .

آخر نصيحة عنقلالكوم وهي خاصة بترقيد الفلفلة حلوة :

كناخدو مقدار من الفلفلة حلوة ، نشويوها ونظفوها من القشرة ونغسلوها ونخليوها تقطر ، نحاولو نجمعو الماء اللي كيقطر منا ونعبرو قدو خل ، كنزيدو عليه شوية ديال قصبور حبوب ، كمون حبوب ، ورقة سيدنا موسى ، 2 فلفلات خوضر حارين ، ملحة ، و 2 ضروس ديال الثومة .
نحطو هاد العناصر في اناء ، نعملوها على العافية وقبل ما يبدا يغلي نهزوه من فوق العافية ، ناخدو قرعة ديال الزاج نقية طبعا نعملو فيها الفلفة ونكبو عليها السائل ونغلقو عليها مزيان . تصبح صالحة للاستعمال بعد 10 ايام وكتدوم حتى لسنة ، غير مي تبغي تهزيها استعملي فورشيط وتجنبي استعمال اليدين .

نتمنى نكون فيدتكوم بهاد النصائح اللي فعلا لقيتا مفيدة وصممت انني نقلالكوم باش نستافدو كلنا ، ما تنساوشي تدعيو معايا بالشفاء العاجل امر بنزلة برد قوية .
شكرا وتحياتي للجميع .