بدااااااااز الحباب

2019-026
تحية طيبة صادقة لكل أخواتي الأنيقات أتمنى تكونوا في أحسن الأحوال ياااااارب
حبوباتي جبت ليكم شهيوة بلدية وأتمنى تعجبكم وتجربوها لأن بداز لذيذ بزاااااف وخصوصا اللي تحضر بالدجاج البلدي نخليكم مع المقادير والطريقة .
المقادير :لحم دجاج _ 4بصلات مقطعين – 4مطيشات منقيين ومقطعين على 2- 2معالق صغار إبزار _ 2معالق صغارسكين جبير _ 2معالق صغارخرقوم _ ملح _ نصف كاس زيت عادي – ربيطة قزبر ومعدنوس _ نصف زلافة حمص _ خضر اللي كتجي في الكسكس أنا درت القرع بأنواعه واللفت والجزر و فلفل حار وسمن حار _ ودقيق الدرة كلما كان رقيق يجي أحسن والماء تقريبا لتر ونصف .
الطريقة : في الطنجرة ندير الدجاج والبصلة ومطيشة والزيت والإبزار وسكين اجبير والخرقوم و الملح ونخليه يتشحر من بعد نضيف الحمص والماء غير يغلى نضيف الخضر باش تطيب مع الدجاج وندير ربطة ربيع وفلفل حار . ( بداز مكيتكسكسش ههههه بحال الكسكس )
وناخد دقيق الدرة ونرشو بالماء ونظغط عليه بيدي (نعركوا )ونديرو يفور وملي يفور نخويه في القصعة ونرشو بالزيت والماء وشوية ملح ونخليه يشرب شوية ونردو يفور مرة تانية وملي يفور نخويه في القصعة ونضيف ليه السمن ونرشو ونضيف للطنجرة شوية سمن حار ونقاد الملح و نرجع بداز يفور .
السمن كيدار في بداز قبل الفورة الأخيرة ماشي بحال كسكسو حتى للأخير لحقاش بداز كيتردم يعني بمجرد ميفور المرة الأخيرة يتسقى فورا ميتبردش وإلا ميشربش المرق . نتمنى يعجبكم لأنه لذيييذ بززاف والدرةخفيفة وصحية .

تسناوني راني جاية خلولي حقي وخى غي شي معلقات

تبارك الله على المغربيات كرم ضيافة او حسن الكلام او ترحاب

شكرا