ابنتي الرضيعة كتيرة البكاء و قليلة النوم

السلام عليكن و رحمة الله
بنتي عندها 7 أسابيع كنرضعها رضاعة طبيعية
فالليل الحمد لله كتفيق مرة وحدة كنرضعها و تنعس
أما النهار النعاس ديالا قليل كنرضعها و نخليها حتى تجشأ و نبدلها و نلعب معاها
شوية تبدا تبكي خصها تنعس كنبقا معاها حتى تنعس غير نزلها تبقى شوية و تفيق و تبدا تغوت و عندها شي غوات حااااار
عاود نبقى معاها حتى تنعس كتنعس شي نص ساعة أو ساعة عاود تنوض
صافي كنبقى غير نسكتها و نرضعها
كنعطيها السكاتة كترميها حتى كنعملها فيها وحد القطرة د السيرو(مذاق ديالو حلو) خرجولا الطبيب على الغازات د البطن عاد كدخليها
مكتخليني نعمل والو
بعض المرات كنخليها تبكي و قلبي كيتقطع باش تعيا و تنعس
واش هادشي عادي؟؟؟
شكون كانت بنتها أو ابنها هكدا؟؟؟
الغوات ديالا كيتعبني نفسيا
كنتمنى شي وحدة تفيدني

---

hfkjd hgvqdum ;jdvm hgf;hx , rgdgm hgk,l ;fdvm

السلام عليكم حتى أنا كنت كنعاني من نفس المشكل حتى ضفت لولدي البيبرونة عاد ولى كينعس تقر تكون الرضيعة ديالك مكتشبعش

أختي حتا أنا بنتي كانت هكاك و كان مشكل ما كتشبعش و كتعيا من مصان و يديها نعاس و تفيق دغيا مشكل كان كتشد غير راس البزوله حتى دخلتلها القرعه عاد شويه وزادولها الغازات فاش كبرت شويه عاد نقصتلي عدد المرات لتنعسا فيهم في النهار

الى كان عندها مشكل التبرز اعزكم الله راه ماتنعسش
خاصها حتى تفرغ كرشها
ومسالة اخرى الغازات ما يخليوهاش تنعس
ديري لها الكامون الصوفي والنافع واللويزة في ماء غليان وعطيهم لها ترضعهم راه اهدنو لها الالم وترتاح
القياس راه غير حبيبات قلال شي تلاتة حبات كمون صوفي وشويش راس معيلقة صغيرة من النافع واللويز جهد تلاتة وريقات
الله افرحك بها

أختي مادام بنتك مبدلة وراضعة ومافيها والو ، حطيها في بلاصتها وخليييييها تبكي حتى نص ساعة ، عنداك يومين ان شاء الله ، وغادي تبقى تنعس مزيييان ، وماتنعس حتى تحطيها في بلاصتها ، كلشي على الولف وصافي ، هي ولفتيها الهزان ، وداك الشي علاش كل شوية تفيق وتلقى راسها في بلاصتها تبقى تبكي تبغيك نتي تهزيها وتنعسيها عندك ، إذا بقت هكدا غادي تعذبي مزيان ، اللهم قسحي قلبك يومين ولا 3 أيام بالكثير وتشوفي النتيجة ، وماتخفيش من البكاء ديالها راه ماغاسي يوقع ليها والوووو ، بالعكس راه البكاء مزيان بزاف للرضع ، وعنننداك ديريلها البيبرون ، والله لا بقات تبغيلك البزولة ، ردي بالك تقولي نعاونها ، راه حليب الأم ربي دارو كافييييي جدا للبيبي ، شربي غير الماء بزاف والحليب وكولي أكل صحي يبقى الحليب غير يجري

وبالنسبة للغازات سيري غير للفرماسيان ، قولو علي شي أعشاب ديال الرضع ، باش مايبقاش الغازات فيهم ، راهم مزيانين

دخلت ندعي معاك ربي يخليها ليك و يفرحك بها

اختي قراي عليها المعوذتين

اختي كلنآ عنينا هكآا نفس مشكلك انا بنتي كانت ترضع متشبعش زدت بيبرون ساعة نفرت البزولة بقات تشذهآ بزز وكلام الاخت نبع الحنان صح البز غير علمن تولفيه غير حاولي تكثري من السوائل باش لحليب يكثر مين تعرفيهآا شبعت مبدلة خليها تبكي حتا تولف

اختي لا تنساي هناك دواء نسيته ما عطتيش ليه هو القران الكريم قراي عليها بعض السور حتي تهدى و تنعس و ترتاح فهو شفاء لكل داء

3ndek sa7 5oti raha twalfat lhaz
wlkin nasiiii7a w7da mt5lihch tebki 9dam babaha wla.. kyb9aw ydaf3oulk lhdra bli m3ndekch l9elb..hh
w5a nti 9elbk ma3alm bih Ri Rebi.