10/03/2019 بسم الله الرحمان الرحيم ، هاد العجينـة كنظن العـديد من الأخوات كيعرفوهـا وهي ط¹ط¬ظٹظ†ظ€ط© أسـاسية ديال الغريبـة ولكن بما أني درتهـا هاد النهـار قلت نوريكم كيفاش منها ممكن تعملي غريبات لا عدد ولا حصـر لهـا بتعديلات بسيطة جـداً . على بركـة الله نبدا بالمقادير : 8 بيضـات 250 غ زبدة رخوة 250 غ زيت ( كاس كبير ) 250 غ سكـر سنيدة ( كاس كبير ) 2 خمارات فانيلا قبصـة ملح الدقيق كتاخد كيلو حتال كيلو و100 غ للتزيين حسب الرغبـة ( أنـا حتاجت شكلاط بيض دايب . كورن فلكس . جلجلان مربى المشماش . الكوك . مربى الفريز . اللوز صحيح . لوز مهرمش . مشماش يابس مقطع . كاندي حبيبات الفنيد ديال سكر ..) 
الطريقـة : ـ في بول كبير ولا قصعـة كنبدا أولا بالزبـدة تكون بدرجـة حرارة المطبخ وكنخدمهـا مزيان بيدي مع السكـر حتى كتولي بحال الكريما . ونضيف الفانيلا . 
ـ من بعد عوض مانبقى نزيد بيضة ببيضة وماكاينش اللي يبقى يكسرها لي عملتهم كاملين في بول وبقيت كنضيف بشوي بشوية جهد بيضة وقدها ديال الزيت وأنا كنخلط مزيان بفُوِّي من نكمل كل الكمية عاد نبقى كنزيد الدقيق والكيسات ديال الخميرة منين يتجمع يبقى جـاري بحال هكا في الصورة خديت منو واحد الكمية بسيطة قل من الربع وجمعتهـا بدقيق اللوز حتى تتجمع ونخليها بحال ديما في عجين الغريبـة رخوة ( طيعة ) . وعلمتها كويرات قد قد . 
وحيدات دوزتهم في اللوز إيفيلي والنصف الثاني في سكـر خلاصي وتنقشها بمنقاش أو أي حاجة تشبه ليه أنا ماعنديش ستعملت قراصة ديال القليان ههههه وهادي صور هاد الجوج غريبات : 
ـ الأشكال الأخرى : عجنت بعدا الباقي ديال العجين بالدقيق اللي بقالي وعملت الكل كويرات متساوين ووجدت مقادير التزيين . . الشكل الثالث : دوزت الكويرات في الجلجلان وعملت ثقب في الوسط وعمرتو بمربى الفريز وإلى الفرن وهدا الشكل النهائي : 
. الشكل الرابع : طربت بيضة وخففتها بلقليل من الحليب ودهنت وجه الغريبة وعاد حطيت في وسطها حبة لوز طرية وإلى الفرن وهدا الشكل النهائي . 
. الشكل الخامس : عملت جوج لاطات عاديين ولما طابو عاد عملت وحدة في الشكلاط بيض دايب ودوزتها في الكورن فلكس مكسر شوية باليد . وهدي صورتها بعد الطهي : 
. الشكل السادس : عملت سيرو قد الما قد السكر ووزدت قد السيرو قد المربى ( مطحون ) ورديتوا علي النار حتى يغلى وحيدتوا . دوزت فيه الغريبات وعاد دوزتها في الكوك مبشور وهادي صورتها : 
. الشكل السابع : درتها عادية وسطها ربع مشماشة ميبسة ( ديال الطاجين ) . . الشكل الثامن : دوزتها في السنيدة وعملت ثقب في الوسط وعمرتوا بحبيبات السكر الملون وهاهم هاد الجوج الأخرين . 
وهادي صورة جماعية : 
Hgt yvdfJm ,yvdfJm lk u[dkJm ,hpJ]m fhgw,v ,hgjthwdg : lgt
يالله وشي ودعيوات زوينين من عندكم ..
يغطيك الصحة فكرة زوييينة
الله يعطيك صحيحتك.
تبارك الله على سميرة الحادكة الله يعطيك الصحة وينولك الي تمنيتي فخاطرك إن شاء الله – وقولي أمين
تسلم يمينك يا سمووور ه
غزال هادشي تبارك الله عليك الله يعطيك مانويتي في خاطرك
السلام عليكم ورحمة الله تعالى وبركاته تبارك الله عليك، الله يعطيك الصحة. هادشي غزال أو كيشهي. سري ا ختي الله يعطيك ما نويتي في خاطرك أو إحفض لك كل ماهو عزيز عليك. والله إخديت منك أفكار، إن شاء الله نطبقها، خصوصاً مع لوليدات صغار كيهمقو على حليوة لفيها شحاجة من الفوق، بحال لوزة، أو هدوك الحبيبات، هههه، راه بنتي جالسا حداية أو كتقولي ماما واش غا تصوبها. مع التقييم أكيد. في أمان الله.
تبارك الله
تبرك الله عليك ويمكن لك تعملي حلوة السمسم ديال الترك قليل فقط في وسك الكورة وتغلقي عليها تفنديها في ابيض البيض واللوز مجروش عمليها في قواغد للمنظر فضل منين تخرج من الفرن سقيها بالعسل واااو مداق تدوب في الفم وتتخلي نسمة رئعة ولمنظر ايضا