تجربتي الناجحة .من دبدوبة إلى نحيلة .الحمد لله .

الحمد لله دابا كلشي كيقولي برااااااااااااااافو عليك,الحمد لله,
1=أول خطوة هي التوكل على الله, أنصح كل أخت أنها تصلي 2ركعتين, وتدعي في السجود الله عز وجل إوفقها لأن كلشي بمشيأة الله,

2=الإرادة والعزيمة والقوة في البدئ, يعني إدا كان الدافع قويا فالإرادة ستكون أكبر, مثلا أنا من كترة ماعانيت من الغلض كلشي والا كيشوفني شرفت ورا الولادة وغلاضيت, ولات حالتي حالا, وليت كنلبس 52 في لاطاي ديال الملابس, فمرضت وليت كنغييييير على راجلي بزاف والمشاكل كترو , مبقيتش كنبغي نخرج كنقول كل الناس كيشوفو فيا ووو…إدن تولدت عندي إرادة كبيرة في إنقاص الوزن, باش نرجع زوييييينة ضعيفة نلبس الملابس الضيقة في البيت, وأبدو جميلة في عيني زوجي…

المهم:
الإرادة+الإستمرار=النجاح
3= ثالت مسألة دخلت لاصال درت الرياضة بانتظام وباجتهاد بلا غش, وكنت نلعب حتى نعرق, 3 مرات في الأسبوع لمدة ساعة, أنا كنت مفقوصة نمشي بكري بنصف ساعة ونبقى نجري في الآلة ديال الجري,وممنوع نغيب

4=بديت كنقرى بزاف على الغداء الصحي على أنواع الريجيم ,ودخلت المنتدى كنت كنسول, جمعت بزاف المعلومات,

5=متبعت حتى ريجيم, أشنو عملت؟
حيدت الممنوعات:
السكر وعوضتو بالعسل الحر في الشاي,أما باقي المشروبات مسوسة(صعيب في الأول بعد 2أسابيع ولفت) الحمد لله,وإنقاص الملح
البطاطا,المعكرون,الحليب قليل,الزبدة,الفرماج,الحلويات كلها,الكسكس,الروز,الدسم,…كلشي هادشي ممنوع.
,إدن في الفطور اعتمدت على زيت الزيتون وخبز القمح ربع صغير وكأس كبير شاي أو قهوة, فقط وبعد الفطور بساعة ونصف تفاح او برتقال, واحدة في اليوم,

الغداء:ضروري الملفوف(ممزيانش لمرض الكبدة ) إما خضر او مشحر مع الخضر في مقلات لأن الملفوف يساعد كثيرا في إنقاص الوزن وإدابة الشحوم+ لحم أودجاج او سمك من الأحسن تكترو منو, أو بيض,وكدلك كنت كنطيب طاجين عادي وأنا كنحط لي في طبيسيل القليل مع ربع صغير من خبز القمح,

الكسكروط بكري مع الساعة 6 :خبز قمح مع زيت الزيتون مع شاي بالزعتر أو دانون مسوس, ممكن تتناولي بعض الفواكه فريز أو تفاح أو برتقال
هدا هو البرنامج, والله العظيم كنت كنحضر العشاوات رائعة الدجاج محمر البسطيلة …, ومع دلك مناكلش,
هاد النظام تبعتو 2 شهرين, ومن بعد شهرين بفضل الله غيرت النظام,
أضفت الكسكس أو الروز أو المعكرونة مرة في الأسبوع 6 حتى 8 ملاعق فقط, ومرة مرة كناكل حلوة,
ويوم في الأسبوع ناكل لي بغيت بيدزا الحلاوي لي بغيتي , لأن الجسم ممكن إولف الرجيم ويبقاش ينقص, ونتي ملي كاتاكلي كتخربقي ليه النظام,وكيولي طيح أكثر,
بفضل الله كنت كنطيح في الأسبوع 4أو5 كيلو, فنقصت 17كيلو في 4 أشهر, والشهر الخامس باش نتبت الوزن كنت كانكل عادي 3 أيام , ونعمل الريجيم 3أيام, باش نتبتو ولله الحمد,تمكنت أنني نتبتو دابا شهر وأنا في الوزن ديال 72 كيلو,
وصفات ساعدتني كتيرا:
—كأس كبير ماء مغلي +2دواور الحمض+ملعقة صغيرة كامون+نصف ملعقة صغيرة زنجبيل+ربع ملعقة صغيرة قرفة(قبل الأكل بنصف ساعة ثلات مرات في اليوم)ضروري يوميا

—كدلك العشوب مهمة كنت كنشري هاد المنتوجات:البابونج+الزعتر+ الكروية…(دائما لايشرب أي مشروب بعد الأكل مباشرة, بل كنت كنستنى ساعة ونصف أو أكتر,باش تفاداي بروز البطن)


—لا تنسو الدعاء الدعاء, الله كبير,سبحانه وتعالى,
أهم مسألة هي التفاءل, كنت قبل من نعس نبقى نتخيل راسي ضعيفة, وكان كيقولي راجلي, لا يمكن طيحي 4 كيلو في الأسبوع كنقول يمكن بإدن الله, أي دائما التفاؤل موجود

والله ولي التوفيق نتمنى نكون أفدتكم قليلا أخواتي,
مرحبا بكل سؤال